Bakı, 5 noyabr, AZƏRTAC Azərbaycanda ipoteka kreditləşməsi mexanizmi 2006-cı ildən fəaliyyət göstərir və indiyədək bu mexanizm vasitəsilə 62 minədək vətəndaşın mənzil əldə etməsinə dəstək göstərilib. Bununla belə, ipoteka portfelindəki mənzillərin böyük əksəriyyətini çıxarışlı əmlaklar təşkil edir.AZƏRTAC xəbər verir ki, bunu İpoteka və Kredit Zəmanət Fondunun İdarə Heyətinin sədr müavini Ramil Tahirov “AIREX 2026” – Birinci Azərbaycan Beynəlxalq Daşınmaz Əmlak Sərgisi çərçivəsində keçirilən 3-cü Dayanıqlı Tikinti Sammitinin “Bünövrədən çıxarışa” adlı panelində çıxışı zamanı deyib.O bildirib ki, ipoteka kreditləşməsi portfelinin təxminən 98,5 faizi çıxarışlı mənzillərdən, yalnız 0,5 faizi isə qabaqcadan qeydiyyat arayışı əsasında əldə edilmiş mənzillərdən ibarətdir: “Mövcud qanunvericilik və ipoteka kreditləşməsini tənzimləyən normativ hüquqi aktlar təminat qeydi əsasında tikintisi başa çatmamış binalardakı mənzillərin də maliyyələşdirilməsinə müəyyən imkanlar yaradır. Lakin bu mexanizmin geniş tətbiqi üçün əlavə hüquqi dəqiqləşdirmələr aparılmalı və tənzimləmə çərçivəsi təkmilləşdirilməlidir”.Ramil Tahirovun sözlərinə görə, təminat qeydi gələcəkdə formalaşacaq mənzilə dair tələb hüququ yaradır: “İpoteka kreditləşməsində isə əsas məsələ həmin əmlakın kredit üzrə təminat predmeti kimi çıxış etməsi, eləcə də borcalan öhdəliklərini yerinə yetirmədiyi halda ipoteka predmetinə tutmanın yönəldilməsi prosedurlarının aydın müəyyənləşdirilməsidir. Bu prosedurların kifayət qədər dəqiq tənzimlənməməsi banklar və fond üçün maliyyə riskləri yarada bilər. Bu baxımdan ipoteka predmetinə tutmanın yönəldilməsi və digər hüquqi məsələlərlə bağlı normativ baza təkmilləşdirilməlidir”.Fondun sədr müavini, həmçinin ipoteka kreditləşməsi mexanizmində iştirak edən sığorta şirkətlərinin və qiymətləndiricilərin fəaliyyətini tənzimləyən hüquqi çərçivənin genişləndirilməsinin vacibliyini vurğulayıb: “Mövcud icbari sığorta qanunvericiliyi tikintisi başa çatmış daşınmaz əmlakın sığortalanmasını nəzərdə tutur. Buna görə də tikinti mərhələsində əldə edilən mənzillərin sığortalanması, onların sığorta predmeti kimi tanınması və bu sahədə tətbiq ediləcək mexanizmlər qanunvericilikdə dəqiq müəyyənləşdirilməlidir”. Müəllif - Vüqar Qurbanoğlu Fotoqraf - Səfiyar Məcnun Videooperator - Şövqi Əzizov