Bakı, 5 noyabr, AZƏRTAC "BMT İdarəetmə İnnovasiyaları Sammiti: Gələcəyə Hazır Təsisatların İnkişafı” adlı sammit çərçivəsində "Ölkələrin innovativ təcrübələri: nələr işləyir, niyə və hansı miqyasda?” mövzusunda panel sessiya keçirilib. AZƏRTAC xəbər verir ki, Qara Dəniz İqtisadi Əməkdaşlıq Təşkilatını, Afrika İttifaqını, Yunanıstanı, Özbəkistanı, Dominikan Respublikasını, Seyşel adalarını təmsil edən nümayəndələrin iştirakı ilə dövlət idarəçiliyində uğurlu innovativ təcrübələr, islahatların konkret nəticələrə çevrilməsi və bu təcrübələrin digər ölkələrdə tətbiqi imkanları müzakirə olunub. Eyni zamanda, dayanıqlı inkişaf məqsədlərinə nail olmaq, institusional potensialı gücləndirmək və gələcək çağırışlara hazırlığı artırmaq üçün effektiv idarəetmə mexanizmləri və əməkdaşlıq imkanları nəzərdən keçirilib.Günün sonuncu sessiyası isə “İnnovasiyalara baxış: süni intellekt və dövlət idarəçiliyinin gələcəyi” mövzusuna həsr edilib. Qazaxıstanı, Zimbabveni, “Oxford Insights”ı və “GenAI Works” şirkətini təmsil edən nümayəndələrin iştirakı ilə süni intellekt və texnologiyaların dövlət idarəçiliyində tətbiqi, innovativ həllərin genişmiqyaslı tətbiqinə keçid və bu istiqamətdə zəruri infrastrukturun, məlumatların idarə edilməsinin və kadr potensialının inkişafı məsələləri müzakirə edilib.İlk günün sessiyalarının sonunda iştirakçılarla interaktiv fikir mübadiləsi aparılıb. Müxbirlər- Günel Türksoy, Tərgül Babayeva
