Bakı, 5 noyabr, AZƏRTAC Bir sıra ölkələr gələcəklə bağlı peşəkar təhlillər və nəticələr hazırlayan institutlar yaradıblar. Bu, çox mühüm addımdır. Lakin belə institutların düzgün şəkildə formalaşdırılması vacibdir.AZƏRTAC xəbər verir ki, bunu Almaniyanın Hertie Məktəbinin baş elmi işçisi, BMT-nin Dövlət İdarəçiliyi üzrə Ekspertlər Komitəsinin sədri Rolf Alter "Dayanıqlı inkişaf naminə gələcəyə hazır dövlət institutlarının formalaşdırılması üzrə əsas məruzələr" adlı plenar sessiyada çıxış edərkən deyib."Ancaq məsələ yalnız institutların yaradılması ilə bitmir. Ən vacib məqamlardan biri onların siyasətin hazırlanması və qərarların qəbul edilməsi prosesinə inteqrasiyasıdır. Gələcək çağırışları müəyyənləşdirən və təhlil edən mütəxəssislərlə məsləhətləşmələr aparılmalı, onların rəyləri siyasət və strategiyaların hazırlanmasında nəzərə alınmalıdır. Bu institutlar, eyni zamanda, müstəqil olmalıdırlar. Çünki onların əsas vəzifəsi elmi məlumatların, sübutların və faktların keyfiyyətini qiymətləndirmək, gələcəyi daha yaxşı anlamaq üçün etibarlı informasiya təmin etməkdir. Gələcək riskləri araşdıran institutların fəaliyyəti qərarların qəbulu və siyasətin formalaşdırılması prosesinə inteqrasiya edilməlidir", - deyə R. Alter əlavə edib. Müxbirlər - Günel Türksoy, Tərgül Babayeva Fotoqraf - İlkin Cavanşirov Videooperator - Vüsal Taqiyev
