Bu gün

Mən bu yaxınlarda həyat yoldaşımla birlikdə Azərbaycana səfər etmiş İsrail vətəndaşıyam. İllər ərzində bir çox ölkələrdə olmuşam, amma Azərbaycan qəlbimdə xüsusi bir iz buraxıb.

Biz Azərbaycana Bakı ilə tanış olmaq üçün getmişdik, ölkənizə həqiqətən valeh olduğumuzu hiss etdik və bu təəssüratla qayıtdıq. Azərbaycanın inkişaf proseslərində əldə etdiyi nailiyyətlər bizi dərindən təsirləndirdi. Müasir memarlıq, infrastruktur, abadlıq və ictimai məkanlar – bunların hamısı görülən böyük işlərin və dövlətin gələcəyi üçün uzunmüddətli baxışın göstəricisidir. Amma memarlıq, iqtisadiyyat və şəhərsalma sahəsindən kənara çıxaraq bir məqamı vurğulamaq istərdim. Deyirlər ki, mahnıdan sözləri çıxarmaq olmaz. Tarix də yenidən yazıla bilməz, heç yazılmasına ehtiyac yoxdur. Azərbaycan onilliklər boyu Sovet İttifaqının tərkibində olub, nəhəng bir dövlətin süqutunu, müstəqilliyin qurulmasının çətin mərhələlərini, eləcə də beynəlxalq miqyasda çoxlu çətinliklər yaşayıb. Buna görə də iqtisadi tərəqqi, dövlətin gücləndirilməsi, beynəlxalq əlaqələrin genişləndirilməsi və suverenliyin ardıcıl müdafiəsi istiqamətində bacarığınız məni xüsusilə heyran etdi. Kiçik və orta dövlətlərin tez-tez qlobal oyunçuların maraqları arasında çətin seçimlər etməli olduğu bugünkü dünyada öz sözünü demək, müstəqil qərarlar qəbul etmək və mövqeyini, milli ləyaqətini qorumaq qabiliyyəti xüsusi hörmətə layiqdir. Fikrimcə, dövlətin əsl gücü təkcə iqtisadi göstəricilər və ya hərbi potensialla ölçülmür. Bu, gələcəyini müstəqil şəkildə müəyyən etmək, maraqlarını qorumaq və eyni zamanda dünyaya, beynəlxalq əməkdaşlığa və mədəni dialoqa açıq qalmaq qabiliyyətində də özünü göstərir. Mən Azərbaycanda güc, praqmatizm və dünyaya açıqlığın kombinasiyasının şahidi oldum.

Tarixi irsə münasibət də eyni dərəcədə güclü təəssürat yaratdı. Bakıda, İçərişəhərdə gəzərkən keçmişlə müasirliyin möhtəşəm vəhdətini gördük. Qədim küçələr, bərpa olunmuş, yeni həyat verilmiş tarixi binalar, təmizlik və səliqəlilik tarixin sadəcə qorunub saxlanılmadığı, həm də müasir standartlara uyğun olaraq inkişaf etdirildiyi bir mühit yaradır.

Paytaxtın təmizliyinə və abadlığına göstərilən diqqət xüsusi təqdirəlayiqdir. Bakını təkcə gözəl deyil, həm də sakinlər və qonaqlar üçün rahat bir şəhərə çevirmək üçün nə qədər çox iş və vəsait sərf olunduğu aydındır.

Azərbaycanın ən böyük xəzinəsi həm də onun insanlarıdır. Onların təhsili, zəkası, qonaqpərvərliyi, dünyaya açıqlığı və səmimi münasibəti bizdə unudulmaz təəssürat yaratdı. Bakı sakinləri ilə ünsiyyətimizdə onlarda geniş dünyagörüşünün, digər mədəniyyətlərə hörmətin və vətənləri ilə qürur duymalarının şahidi olduq.

Zabit hərbi rütbəsinə və uzun illər böyük kollektivləri idarə etmək təcrübəsinə malik bir şəxs kimi sistemli nəticələr əldə etməyin nə qədər çətin olduğunu yaxşı başa düşürəm. Gözəl binalar cəmi bir neçə ilə tikilə bilər. Lakin hörmət, təhsil, sosial məsuliyyət və gələcəyə inam mədəniyyətini inkişaf etdirmək tamamilə fərqli bir vəzifədir. Buna görə də Azərbaycanda gördüklərim xüsusi ehtiram doğurur.

İsrail vətəndaşı olaraq, ölkəmizə və onun vətəndaşlarına qarşı mehriban münasibətin, sərbəst ünsiyyətin və qarşılıqlı mədəni maraqların şahidi olmaqdan məmnunam.

Hörmətli cənab Prezident!

Dövlət rəhbərinin tez-tez problemlər, xahişlərlə dolu məktublar aldığını başa düşürəm. Buna görə də Sizə sadəcə demək istəyirəm ki, Azərbaycanda görülən işlərin nəticələri hətta digər ölkələrdən buraya gələn insanlar tərəfindən də nəzərə alınır və yüksək qiymətləndirilir. Bəlkə də turist dövlətin üzləşdiyi bütün çətinlikləri görmür. Amma məhz kənar baxış bəzən baş verən dəyişikliklərin miqyasını xüsusilə aydın şəkildə görməyə imkan verir. Bakıdan ən gözəl hisslər, xatirələr və bir daha bu şəhərə qayıtmaq arzusu ilə ayrıldıq.

Azərbaycan turist kimi gələ, amma ürəyinin bir hissəsini qoyub qayıda biləcəyin bir ölkədir. Buna görə Sizə və xalqınıza təşəkkür edirəm.

Dərin hörmət və ən xoş arzularla,

Tomi Şeynberq,

İsrail Dövləti.