Xokkey üzrə Dünya Çempionatının rəsmi sponsoru olan “Tipsport” bukmeker şirkəti Rusiya millisinin may ayında keçiriləcək mundialda iştirakına qarşı çıxıb.
Şirkətin mətbuat katibi Vatslav Şoxor bildirib ki, Rusiya millisinin iştirakı ilə mümkün oyunlar zamanı loqotiplərinin hər hansı bir formada olmasına qəti şəkildə qarşıdırlar.
“Tipsport”un mövqeyi Rusiya təcavüzünün başlanğıcından bəri dəyişməz olaraq qalıb: biz Ukraynanı dəstəkləyən ən böyük şirkətlərdən biriyik. Biz KHL matçlarına və ya digər Rusiya və Belarus liqalarına mərc qəbul etmirik və əlbəttə ki, Rusiya milli komandasının iştirak etdiyi matçlara mərc təklif etmək niyyətində deyilik. Eynilə, reklamımızın Dünya Çempionatında Rusiyanın iştirak etdiyi matçlar zamanı – istər buz meydançasında, istərsə də televiziya yayımları zamanı görünməsini təsəvvür etmirik.
İdman Arbitraj Məhkəməsinin qərarı qalmaqallı, anlaşılmaz və mənəvi cəhətdən tamamilə əsassızdır. Rusiya Ukraynada qətllər törədir və bütün demokratik dünyaya qarşı hibrid müharibə aparır, lakin məhkəmə onların Dünya Çempionatında iştirak etməsinə icazə verir – Ukrayna xokkeyçiləri isə ölkələrini rus təcavüzkarlarından müdafiə edərək həlak olurlar”, – Şoxor deyib.