Azərbaycan Dövlət Neft Şirkətinin (SOCAR) müstəqil şəkildə və ya əsas payçı qismində istismar etdiyi yataqlarda 2026-cı ilin üçüncü rübündə 1,72 milyon ton neft və 1,7 milyard kubmetr təbii qaz hasil olunub. Bu, 2025-ci ilin müvafiq dövrü ilə müqayisədə neft hasilatında 5,1%, qaz hasilatında isə 12,8% azalma deməkdir.
Ötən ilin üçüncü rübündə SOCAR-ın neft hasilatı 1,81 milyon ton, qaz hasilatı isə 1,94 milyard kubmetr təşkil etmişdi. Beləliklə, şirkətin neft hasilatı illik müqayisədə 93 min ton, qaz hasilatı isə 248,2 milyon kubmetr azalıb.
Bununla yanaşı, SOCAR-ın qazma işlərinin həcmi 74,3% artaraq 12 146 metrdən 21 176 metrə yüksəlib.
Ölkə üzrə xam neft hasilatı 5,6% azalaraq 6,59 milyon ton, təbii qaz hasilatı isə 3,6% geriləyərək 12,47 milyard kubmetr təşkil edib. Ötən ilin eyni dövründə bu göstəricilər müvafiq olaraq 6,98 milyon ton və 12,94 milyard kubmetr olmuşdu.
SOCAR-ın xarici bazarlara ixrac etdiyi neftin həcmi illik müqayisədə 4,5% və ya 184,6 min ton azalaraq 3,92 milyon ton təşkil edib. Bu göstəriciyə şirkətin öz hasilatı ilə yanaşı, beynəlxalq konsorsiumların hasil etdiyi neftdən Azərbaycan dövlətinə və SOCAR-a çatan mənfəət payları da daxildir.
Ölkə üzrə təbii qaz ixracı 8,7% azalaraq 5,74 milyard kubmetrə, daxili istehlak isə 6,7% azalaraq 2,27 milyard kubmetrə düşüb. Ötən ilin eyni rübündə qaz ixracı 6,29 milyard kubmetr, istehlak isə 2,44 milyard kubmetr olmuşdu.
Hesabat dövründə SOCAR-ın neft emalı 3,2% azalaraq 1,63 milyon ton, qaz emalı isə 16,9% azalaraq 631,7 milyon kubmetr təşkil edib.
Bunun əksinə olaraq, şirkətin Azərbaycandakı müəssisələrində istehsal edilən neft, neft-kimya və qaz-kimya məhsullarının ixracı 2,8% artaraq 639,2 min tondan 657,4 min tona yüksəlib.
2026-cı ilin yanvar-sentyabr aylarında Azərbaycan xarici bazarlara 15,5 milyon ton neft və kondensat, 18,4 milyard kubmetr təbii qaz ixrac edib. Noyabrın 2-də dünya bazarında Brent markalı neftin qiyməti 110 dollar/barel ətrafında, Avropanın TTF qaz birjasında dekabr fyuçerslərinin qiyməti isə 102 avro/MVt-saat civarında olub. Dünya Bankının oktyabr proqnozuna əsasən, Brent neftinin orta qiyməti 2026-cı ildə 91 dollar, 2027-ci ildə isə 79 dollar təşkil edəcək. Qurum Avropada təbii qazın qiymətinin 2026-cı ildə təxminən 60% bahalaşacağını, 2027-ci ildə isə 8% ucuzlaşacağını gözləyir. Azərbaycan hökuməti 2027–2030-cu illər üzrə büdcə hesablamalarında neftin qiymətini 65 dollar/barel götürüb. Azərbaycan Mərkəzi Bankının oktyabr proqnozunda isə neftin orta illik qiyməti 2026-cı il üçün 92,8 dollar, 2027-ci il üçün 82,8 dollar nəzərdə tutulub.
