BMT-nin humanitar agentliklərinin cümə günü verdiyi məlumata görə, Yəməndə davam edən döyüşlər insanları evlərini tərk etməyə məcbur edir və resursların çatışmazlığı Taiz əyalətinin səhiyyə sisteminə ciddi təzyiq göstərir.
Bu barədə "Xinhua" agentliyi xəbər verib.
Məlumata əsasən, BMT-nin Humanitar İşlərin Koordinasiyası Ofisi (OCHA) avqust ayında yeni döyüşlərin başlamasından bəri 256 mindən çox insanın evlərini tərk etmək məcburiyyətində qaldığını bildirib.
Birləşmiş Millətlər Təşkilatının Qaçqınlar üzrə Ali Komissarlığının məlumatına görə, məcburi köçkün ailələrin ən böyük ehtiyacı sığınacaq, ərzaq və maliyyə yardımıdır.
Ümumdünya Səhiyyə Təşkilatı xəbərdarlıq edib ki, Taiz əyalətində yanacaq, dərman və tibbi ləvazimatlar çatışmazlığı həyati əhəmiyyətli səhiyyə xidmətlərinin göstərilməsinə təhlükə yaradır. Təkcə Taiz şəhərində 42 tibb müəssisəsində ciddi resurs çatışmazlığı qeydə alınıb ki, bu da təcili əməliyyatlar, dializ, reanimasiya, ana və yeni doğulmuş körpələrə qulluq üçün təhlükə törədir.