Asiya Futbol Konfederasiyası (AFC) FİFA prezident seçkilərində Canni İnfantinonun namizədliyini dəstəkləyib.
Bu barədə AFC prezidenti Şeyx Salman bin İbrahim Əl-Xəlifə Tokioda keçirilən təşkilatın fövqəladə konqresində bildirib.
Şeyx Salman deyib: "FİFA prezidenti kimi sizi və rəhbərliyinizi dəstəkləməyə tam sadiq olduğumuzu bir daha təsdiqləyirik".
Eyni zamanda, o, konfederasiyanın bütün üzvlərinin mütləq İnfantinonu dəstəkləməyəcəyini etiraf edib, baxmayaraq ki, onun sözlərinə görə, mövqeyini assosiasiyaların əksəriyyəti bölüşür.
Salman həmçinin tərəflərin fikir ayrılıqlarını geridə qoyub irəliləməli olduqlarını bildirib. İnfantino həmçinin səhvlərini etiraf edib və keçmiş təcrübələrdən dərs çıxarmağın vacibliyini vurğulayıb.
FİFA prezident seçkiləri mart ayında keçiriləcək. Namizədlərin ərizələrini təqdim etmələri üçün son tarix 18 noyabrdır.
İnfantino çıxışı zamanı bildirib ki, gələn ilin yanvarın 1-dən etibarən hər bir milli assosiasiya hər dörd ildən bir 25 milyon dollar alacaq. FİFA prezidentliyinə başlamazdan əvvəl bu məbləğ 1 milyon dollar idi.