Noxud, lobya və mərciməyin mühüm faydası

Mərci, noxud, lobya və digər paxlalı bitkilər sağlam qidalanmanın mühüm hissəsi hesab olunur. Bu məhsulların əsas üstünlüklərindən biri tərkibində həm bitki mənşəli zülalın, həm də qida liflərinin yüksək olmasıdır. Xüsusilə lifin çoxluğu onların qan şəkərinin tənzimlənməsində rolunu artırır.

Foodinfo.az-a istinadən, paxlalı bitkilər həzm sistemində nisbətən yavaş parçalandığından onların tərkibindəki karbohidratlar qana daha tədricən daxil olur. Bu xüsusiyyət yeməkdən sonra qan şəkərinin kəskin yüksəlməsinin qarşısını almağa kömək edir. Buna görə də mərci və noxud kimi məhsullar diabet riski olan şəxslərin qidalanmasında da əhəmiyyətli seçimlərdən sayılır.

Bu qidaların tərkibində maqnezium, dəmir, kalium, folat və digər vacib minerallar da mövcuddur. Maqnezium orqanizmdə insulin fəaliyyətində, dəmir oksigenin daşınmasında, folat isə hüceyrələrin yenilənməsində iştirak edir.

Paxlalı bitkilərin digər üstünlüyü uzun müddət toxluq hissi yaratmasıdır. Bu, yeməklər arasında həddindən artıq qəlyanaltı qəbulunun azalmasına yardımçı olur.

Dietoloqlar paxlalı bitkilərin həftəlik qidalanma planında mütəmadi yer almasını tövsiyə edirlər. Lakin bəzi insanlarda bu məhsullar köp və qaz yaradır. Onları bişirməzdən əvvəl islatmaq və yaxşı bişirmək həzm narahatlığını azaltmağa kömək edir.