Tenderyard alıcı və satıcıları süni intellektlə əlaqələndirir

Alıcı ehtiyacını paylaşır, satıcı təklifini yerləşdirir, sistem isə onları uyğunlaşdırır.

Tenderyard alış və satış elanlarını, ağıllı axtarışı və birbaşa ünsiyyət imkanlarını vahid platformada birləşdirir.

Platformanın təqdim etdiyi məlumata görə, əsas məqsəd istifadəçilərin məhsul və xidmət axtarışına sərf etdiyi vaxtı azaltmaq, satıcıların isə uyğun alıcılarla əlaqə qurmasını asanlaşdırmaqdır. Tenderyard həm fərdi istifadəçilər, həm də sahibkarlar üçün nəzərdə tutulub.

Alıcılar da elan yerləşdirə bilir

Tenderyardda istifadəçilər satmaq istədikləri məhsullarla yanaşı, almaq istədikləri məhsul və xidmətlər barədə də elan yarada bilirlər. Satış elanları “Satış təklifləri”, alış elanları isə “Alış sorğuları” formasında təqdim olunur.

Məsələn, müəyyən model telefon, avtomobil və ya istehsal avadanlığı axtaran şəxs istədiyi xüsusiyyətləri və qiymət aralığını qeyd edir. Sistem bu sorğunu uyğun satış təklifləri ilə müqayisə edir. Uyğunluq müəyyənləşdirildikdə alıcıya və satıcıya mobil tətbiq və şəxsi kabinet vasitəsilə bildiriş göndərilir.

İstifadəçilər axtarış filtrlərini yadda saxlayaraq seçdikləri meyarlara uyğun yeni elanlar barədə də məlumat ala bilirlər. Beləliklə, eyni axtarışı mütəmadi təkrarlamaq əvəzinə, yeni təklifləri bildirişlər vasitəsilə izləmək mümkün olur.

Mətn, səs, şəkil və Excel ilə elan yaratmaq

Platformada elan hazırlamaq üçün müxtəlif üsullar təqdim edilir. İstifadəçi məhsulu mətnlə təsvir edə, səsli məlumat verə və ya şəklini yükləyə bilər. Süni intellekt daxil edilən məlumat əsasında məhsulun kateqoriyasını və müəyyən edilə bilən xüsusiyyətlərini seçərək elanın hazırlanmasına kömək edir.

Mətnlərin qrammatik redaktəsi, şəkil keyfiyyətinin yaxşılaşdırılması və məhsula uyğun təsvirlərin hazırlanması da təqdim olunan imkanlar arasındadır. Sistem alış və satış elanının növü səhv seçildikdə məzmunu təhlil edərək istifadəçini uyğun bölməyə yönləndirir.

Çoxsaylı məhsulla işləyən sahibkarlar üçün Excel vasitəsilə toplu elan yerləşdirmək mümkündür. Məhsul siyahısı platformaya yükləndikdən sonra məlumatlar emal olunur və elanlar hazırlanır. Bu üsul hər məhsul üçün məlumatların ayrıca daxil edilməsinə sərf olunan vaxtı azaltmağa yönəlib.

Bundan başqa, mövcud elanları link vasitəsilə köçürmək və məhsulun barkod məlumatlarından istifadə etməklə elan yaratmaq imkanı da var.

Məhsulu adı ilə yanaşı şəkli və səslə axtarmaq

Tenderyardın axtarış sistemi istifadəçinin adi cümlə ilə yazdığı və ya səsləndirdiyi sorğunu təhlil edərək uyğun parametrləri müəyyənləşdirir. Məhsulun adını bilməyən istifadəçi isə onun şəklini yükləməklə vizual cəhətdən uyğun təklifləri axtara bilər.

Səsli idarəetmə funksiyası platformada axtarış aparmağa, filtrləri seçməyə və elan yaratmağa imkan verir. Xəritə üzərindən axtarış isə elanların yerləşdiyi ərazini və məsafəni nəzərə almağa kömək edir.

Daşınmaz əmlak bölməsində konkret binanın şəkli və yerləşdiyi yer əsasında alış sorğusu yaratmaq mümkündür. Həmin binada uyğun mənzil elanı yerləşdirildikdə tərəflər bildiriş alırlar. Waze inteqrasiyası isə elanlarda göstərilən məkanlara istiqamət tapmağı asanlaşdırır.

Xarici təkliflər və bazar qiymətləri bir yerdə

Qlobal axtarış funksiyası müxtəlif ölkələrdəki məhsulları, istehsalçıları və təchizatçıları araşdırmaq üçün nəzərdə tutulub. Çoxdilli axtarış və elanların müxtəlif dillərdə göstərilməsi istifadəçilərin xarici təkliflərlə tanış olmasına kömək edir.

Platformanın məlumat toplama və bazar monitorinqi sistemi müxtəlif mənbələrdəki məhsulları, qiymət dəyişikliklərini və yeni təklifləri izləyir. Qiymət təhlili funksiyası isə alıcılara təklifləri müqayisə etmək, satıcılara məhsullarının qiymətini müəyyənləşdirərkən bazardakı diapazonları nəzərə almaq imkanı verir.

Birbaşa ünsiyyət və bizneslər üçün rəqəmsal köməkçi

Alıcı və satıcılar tətbiqdən çıxmadan yazılı və səsli mesaj göndərə, səsli və görüntülü zəng edə bilirlər. Məhsulların görünüşünü və istifadəsini göstərmək üçün video və Reels formatında elanlar da yerləşdirmək mümkündür.

Süni intellekt əsaslı çatbot istifadəçilərə elan yaratmaqda, axtarış aparmaqda və platformanın funksiyalarından yararlanmaqda kömək edir. Çatbotla WhatsApp vasitəsilə əlaqə imkanı da təqdim olunur. Satış nöqtələri üçün ayrıca çatbot isə məhsul və xidmətlər barədə müştəri suallarının cavablandırılmasını dəstəkləyir.

Tenderyardın inkişaf planlarında biznes iştirakçıları arasında davamlı əlaqələrin qurulması, gələcək mərhələdə isə eskrou hesabları və logistika xidmətlərinin inteqrasiyası nəzərdə tutulur. Platformanın əsas yanaşması insanların nə satdıqları ilə yanaşı, nə almaq istədiklərini də görünən etmək və uyğun tərəfləri əlaqələndirməkdir.