Bakı, 20 noyabr, AZƏRTAC Bu ilin yanvar-oktyabr aylarında Azərbaycanda nəqliyyatın müxtəlif növləri ilə sərnişindaşıma sahəsində müəyyən artım qeydə alınıb.Dövlət Statistika Komitəsindən AZƏRTAC-a bildirilib ki, hesabat dövründə dəmir yolu nəqliyyatı ilə 456,5 min sərnişin daşınıb. Bu, qeyd olunan dövrün göstəricisindən 22,2 faiz çoxdur. Dəniz nəqliyyatı ilə sərnişindaşıma 18,7 min nəfər təşkil edib ki, bu da 98,9 faiz artım deməkdir.Hava nəqliyyatı ilə 7 milyon 367,9 min sərnişin daşınıb. Ötən ilin müvafiq dövrü ilə müqayisədə bu göstərici 5,3 faiz artıb. Metro nəqliyyatından istifadə edən sərnişinlərin sayı isə 2 milyon 43,7 min nəfər olub. Bu, əvvəlki ilin eyni dövrü ilə müqayisədə 6 faiz azdır.Hesabat dövründə avtomobil nəqliyyatı ilə 29 milyon 123,3 min sərnişin daşınıb. Bu göstərici ötən ilin müvafiq dövrünə nisbətən 11,9 faiz çoxdur. Avtomobil nəqliyyatı ilə daşınan sərnişinlərin 91,8 faizi avtobusların, 8,2 faizi isə minik taksilərinin xidmətlərindən istifadə edib. Avtobuslarla 26 milyon 431 min sərnişin daşınıb və bu, illik müqayisədə 11,9 faiz artım deməkdir. Minik taksiləri ilə daşınan sərnişinlərin sayı isə 2 milyon 692,3 min nəfər olub. Bu sahədə 11,5 faizlik artım qeydə alınıb.