Bakı, 20 noyabr, AZƏRTAC 2027–2030-cu illəri əhatə edəcək Sosial-İqtisadi İnkişaf Strategiyasında orta ixtisas təhsili müəssisələrinin, xüsusilə kolleclərin ali təhsil müəssisələrinə inteqrasiyası istiqamətində bir sıra hədəflərin müəyyənləşdirilməsi nəzərdə tutulur.AZƏRTAC xəbər verir ki, bunu Elm və Təhsil Nazirliyinin Elm, ali və peşə təhsili şöbəsinin müdiri Turxan Süleyman 2026/2027-ci tədris ili üzrə orta ixtisas təhsili müəssisələrinə tələbə qəbulu nəticələrinin müzakirəsinə həsr olunan tədbirdə çıxışı zamanı deyib. O bildirib ki, 2022–2026-cı illəri əhatə edən Sosial-İqtisadi İnkişaf Strategiyasında orta ixtisas təhsili ilə bağlı ayrıca yol xəritəsi nəzərdə tutulmasa da, növbəti mərhələdə kolleclərin inkişafı və ali təhsil sistemi ilə əlaqələrinin gücləndirilməsi diqqət mərkəzində olacaq. Əsas yanaşma orta ixtisas təhsili pilləsinin ali təhsil ekosisteminin ayrılmaz tərkib hissəsi kimi formalaşdırılmasıdır. Bu çərçivədə mövcud kolleclərin müvafiq ali təhsil müəssisələrinə inteqrasiyası və onların birgə fəaliyyətinin təmin edilməsi planlaşdırılır.Onun sözlərinə görə, inteqrasiya dedikdə yalnız inzibati tabelik deyil, kolleclərin ali təhsil müəssisələrinin vahid idarəetmə və fəaliyyət sisteminə daxil edilməsi nəzərdə tutulur. Beləliklə, ali təhsil müəssisələrində bakalavriat, magistratura və doktorantura səviyyələri ilə yanaşı, orta ixtisas təhsili pilləsi üzrə də mütəxəssis hazırlığının həyata keçirilməsi planlaşdırılır.Turxan Süleyman diqqətə çatdırıb ki, qarşıdakı dövrdə Milli Kvalifikasiyalar Çərçivəsinin beşinci səviyyəsi üzrə də müəyyən dəyişikliklər gözlənilir. Hazırda bu səviyyədə həm yüksək texniki peşə, həm də orta ixtisas təhsili pillələri mövcuddur. Bəzi ixtisaslar üzrə təkrarlanma və məzmun baxımından üst-üstə düşmə hallarının aradan qaldırılması istiqamətində işlər aparılır. Elm və Təhsil Nazirliyi tərəfindən peşə təhsili pilləsi üzrə ixtisasların təsnifatı yenilənib. Bu zaman kolleclərdə tədris olunan ixtisaslarla yüksək texniki peşə təhsili üzrə ixtisasların uyğunlaşdırılmasına, təkrarlanmanın və mövcud uyğunsuzluqların aradan qaldırılmasına xüsusi diqqət yetirilib.Şöbə müdiri, həmçinin kolleclərə tələbə qəbulunun təşkili ilə bağlı qarşıdakı illərdə gözlənilən dəyişikliklərə toxunub. O qeyd edib ki, son illərdə 9 və 11 illik təhsil bazasından qəbulun nisbətində əhəmiyyətli dəyişikliklər edilib. Növbəti mərhələdə isə beynəlxalq təcrübə nəzərə alınmaqla, 2027–2030-cu illər ərzində kolleclərə qəbulun əsasən 11 illik təhsil bazası əsasında aparılması istiqamətində yanaşma nəzərdən keçirilir. Müxbir - Tünzalə Arazlı Fotoqraf - Nicat Haşımov