Antalya, 15 noyabr, AZƏRTAC Azərbaycan universitetləri ilə daha sıx əməkdaşlıq etməyə hazırıq. Xüsusilə Azərbaycan Dövlət Aqrar Universiteti (ADAU) ilə aktiv dialoqdayıq, beynəlxalq, ikili diplom proqramı həyata keçiririk. Qardaş ölkənin digər ali təhsil ocaqları ilə də sıx əlaqələrdə maraqlıyıq.Bu fikri Antalya şəhərində keçirilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 31-ci sessiyasında (COP31) AZƏRTAC-a açıqlaması zamanı Türkiyənin Ege Universitetinin rektoru, professor Musa Alcı səsləndirib.Onun sözlərinə görə, ikili diplom proqramı üçün İzmirə gələn ADAU tələbələri təhsil haqqı ilə yanaşı staj imkanları da qazanır. “Xüsusilə aqrar sahədə kadr hazırlığı baxımından geniş imkanlarımız mövcuddur. İzmirin Bornova rayonunda universitetimizə aid dörd kvadrat kilometr ərazidə fermalarımız mövcuddur. Oranı həm kənd təsərrufatı, həm də heyvandarlıq sahəsində gənc mütəxəssislər yetişdirmək üçün ayırmışıq. Bütün imkanlarımız azərbaycanlı tələbələr üçün açıqdır”, - deyən Türkiyəli rektor, sözügedən bölgədə universitetə aid zeytun yağı zavodu ilə balıq yetişdirmə müəssisəsinin də fəaliyyət göstərdiyini ifadə edib. Ege Universitetinin təşəbbüsü ilə yaradılan Türk Dövlətləri Universitetlərinin Kollektiv Davamlılıq Şəbəkəsinin əhəmiyyətnindən də danışan M.Alcı, təşkilata Azərbaycan, Özbəkistan və Qazaxıstan ali təhsil ocaqlarının qoşulduğunu ifadə edib: “Hesab edirəm ki, universitetlər iqlim və davamlı inkişafın ön cərgələrində olmalıdır”. Ramin Abdullayev AZƏRTAC-ın xüsusi müxbiri Antalya
