Tbilisi, 14 noyabr, AZƏRTAC Avropa Siyasi Birliyi qısa müddətdə Avropa qitəsində ən geniş siyasi müzakirə və əməkdaşlıq platformasına çevrilib. İrlandiyanın paytaxtı Dublində keçirilən 9-cu Sammit bu formatın aktual əhəmiyyətini bir daha təsdiqləyir. Tədbirin gündəliyinə enerji təhlükəsizliyi, nəqliyyat-kommunikasiya bağlantıları, regional sabitlik və qlobal çağırışların həlli kimi strateji məsələlər daxil edilib. Bu prioritetlər Azərbaycanın son illərdə uğurla həyata keçirdiyi xarici siyasət kursu ilə tam şəkildə üst-üstə düşür.Prezident İlham Əliyevin Dublin Sammitində iştirakı ölkəmizin Avropa ilə dialoqu ən yüksək səviyyədə və birbaşa formatda apardığını nümayiş etdirir. Bu təmsilçilik həm ikitərəfli tərəfdaşlıq əlaqələrinin dərinləşdirilməsi, həm də çoxtərəfli müstəvidə milli maraqlarımızın qətiyyətlə müdafiə olunması baxımından mühüm əhəmiyyət daşıyır.Son dövrlərdə Avropa ölkələrinin Azərbaycana olan marağının sistemli şəkildə artması müşahidə olunur. Bu tendensiya təkcə enerji amili ilə məhdudlaşmır; bu maraq ölkəmizin beynəlxalq münasibətlər sistemində artan geosiyasi çəkisi, regional və qlobal proseslərdə oynadığı fəal rol, eləcə də Prezident İlham Əliyevin beynəlxalq miqyasdakı yüksək nüfuzu ilə şərtlənir. Bunun əyani sübutu kimi, Avropa İttifaqının rəhbər şəxslərinin Bakıya ardıcıl səfərlərini qeyd etmək kifayətdir. Eyni zamanda, Davos, Münxen və digər nüfuzlu qlobal forumlarda Azərbaycan Prezidenti ilə görüşlərin qarşı tərəfin təşəbbüsü ilə təşkil olunması ölkəmizin artıq təşəbbüskar, dialoqa dəvət edən deyil, birbaşa dialoqa dəvət olunan nüfuzlu tərəfdaş olduğunu təsdiqləyir.Azərbaycan ilə Avropa İttifaqı arasında tərəfdaşlıqdan danışarkən enerji və nəqliyyat amilləri xüsusi qeyd olunmalıdır. Bu amillər ikitərəfli tərəfdaşlıqda həlledici yer tutur. 2022-ci ildə imzalanmış enerji sahəsində strateji tərəfdaşlığa dair Anlaşma Memorandumu əməkdaşlığı keyfiyyətcə yeni mərhələyə qaldırıb. Hazırda Azərbaycan qazı 16 ölkəyə, o cümlədən Aİ-nin 10 üzv dövlətinə ixrac olunur və bu coğrafiya mütəmadi olaraq genişlənir.Bununla yanaşı, yaşıl enerji keçidi, nəqliyyat və loqistika sahələri də prioritet istiqamətlər sırasındadır. Xəzər dənizinin zəngin külək enerjisi potensialı, günəş enerjisi layihələri, Mərkəzi Asiya ilə yaşıl enerji dəhlizlərinin yaradılması və Qara dənizin dibi ilə elektrik kabelinin çəkilməsi layihələri Azərbaycanı Avropanın yaşıl enerji təhlükəsizliyində əvəzedilməz tərəfdaşa çevrir.Trans-Xəzər Beynəlxalq Nəqliyyat Marşrutu (Orta Dəhliz), eləcə də Şərq-Qərb və Şimal-Cənub nəqliyyat dəhlizləri isə Azərbaycanın Avropa ilə Asiya arasında strateji tranzit mərkəzi kimi rolunu daha da gücləndirir.Bütün bu nailiyyətlərin təmərküzləşdiyi əsas məqam qətiyyətli lider faktorudur. Lider faktoru və çoxtərəfli diplomatiyada qazanılan uğurlar bu layihədə xüsusi əhəmiyyət kəsb edir. Dövlətimizin başçısının uzaqgörən siyasəti, həyata keçirdiyi balanslaşdırılmış və milli maraqlara əsaslanan daxili və xarici kurs beynəlxalq birliyin diqqət mərkəzindədir.Prezident İlham Əliyev Avropa Siyasi Birliyinin təsis olunduğu gündən etibarən bu platformanın işində fəal təmsil olunub. 2026-cı ilin mayında İrəvanda keçirilmiş 8-ci Sammitdə dövlətimizin başçısının videobağlantı formatında çıxışı isə Azərbaycanın sülh və əməkdaşlıq təşəbbüslərinə sadiqliyini bir daha nümayiş etdirib.Dublin Sammiti çərçivəsində Prezident İlham Əliyevin Aİ Şurasının Prezidenti və bir sıra dövlət və hökumət başçıları ilə keçirdiyi ikitərəfli görüşlər Cənubi Qafqazda davamlı sülhün və təhlükəsizliyin təmin olunması istiqamətindəki mövqeyimizin çatdırılması üçün mühüm imkan yaradıb. Xüsusilə Böyük Britaniya ilə Strateji Tərəfdaşlıq haqqında Birgə Bəyannamənin mübadiləsi ikitərəfli münasibətlərin institusional təmərlərini daha da möhkəmləndirib.Azərbaycanın 2028-ci ildə Avropa Siyasi Birliyinin Sammitinə ev sahibliyi etməsi barədə qərar ölkəmizin beynəlxalq miqyasdakı nüfuzunun və çoxtərəfli diplomatiyadakı qətiyyətli rolunun növbəti təsdiqidir. 2028-ci ilin mayında Bakıda keçiriləcək bu mötəbər tədbir Azərbaycanın Avropa ölkələri ilə siyasi dialoqunu daha da dərinləşdirməsi və yeni əməkdaşlıq üfüqləri açması baxımından tarixi bir mərhələ olacaq. Xətayi Əzizov AZƏRTAC-ın xüsusi müxbiri Tbilisi