London, 12 noyabr, AZƏRTACBöyük Britaniyada iqtisadi artımın zəifləməsi, yaşayış xərclərinin yüksəlməsi və Polşada iqtisadi imkanların genişlənməsi fonunda bu ölkədə yaşayan polyakların bir hissəsi vətənlərinə qayıtmağa üstünlük verir.AZƏRTAC “The Telegraph”a istinadla xəbər verir ki, son illərdə Polşada əməkhaqlarının artması, yaşayış xərclərinin Britaniya ilə müqayisədə daha aşağı olması və vergi güzəştləri xaricdə yaşayan polyakların geri qayıtmasını təşviq edən əsas amillər sırasındadır. 2004-cü ildə Polşanın Avropa İttifaqına üzv olmasından sonra yüz minlərlə polyak daha yaxşı iş imkanları axtarışında Böyük Britaniyaya köçüb. 2017-ci ildə Britaniyada yaşayan Polşa vətəndaşlarının sayı bir milyonu ötüb və onlar ölkənin ən böyük miqrant icmalarından birini təşkil ediblər.Lakin xüsusilə “Brexit”dən sonra vəziyyət dəyişməyə başlayıb. Polşa İqtisadi İnstitutunun hesablamalarına əsasən, ötən ilin sonunda Böyük Britaniyada yaşayan polyakların sayı təxminən 738 min nəfərə enib. Polşada 2022-ci ildə tətbiq edilən vergi güzəştləri proqramı da xaricdən qayıdan vətəndaşlar üçün əlavə stimul yaradıb.Məlumata görə, Britaniyanın iqtisadi imkanlarının zəifləməsi fonunda bəzi polyaklar artıq öz ölkələrində Böyük Britaniyadakından daha yüksək gəlir əldə edə bilirlər. Aytən Abbaslı AZƏRTAC-ın xüsusi müxbiri London
