Berlin, 8 noyabr, AZƏRTAC Berlindəki Azərbaycan Mədəniyyət Mərkəzində Səhiyyə Nazirliyi, TƏBİB və Azərbaycanın Almaniyadakı səfirliyinin təşkilati dəstəyi, habelə hər iki ölkədə çalışan azərbaycanlı həkimlərin birliklərinin təşkilatçılığı ilə 20-ci Azərbaycan-Alman Tibb Günləri beynəlxalq konfransı keçirilib. Tədbirdə Azərbaycandan gəlmiş 50-yə yaxın və Almaniyanın müxtəlif klinikalarında çalışan 100-dən çox tibb mütəxəssisi iştirak edib. AZƏRTAC xəbər verir ki, bu barədə Azərbaycan-Alman Tibb Günlərinin həmsədri professor Qurbanxan Müslümov media nümayəndələrinə açıqlamasında deyib.Konfransın açılışında bu kimi tədbirlərin əhəmiyyətini, Azərbaycan ilə Almaniya arasında tibbi əlaqələrin genişlənməsindəki rolunu vurğulayan Q.Müslümov bildirib ki, plenar iclaslarda tibbdəki yeni çağırışlar, robotik texnologiyalar, minimal invaziv üsulların tətbiqi və Azərbaycanda bu sahədəki mövcud vəziyyət müzakirə olunub.“Bu gün Almaniyada 3 minə yaxın azərbaycanlı həkim çalışır. Onların bir qismi professorlar və klinika rəhbərləridir. Konfransda həkimlərimizin təcrübəsindən ölkəmizdə tibbin inkişafı üçün yararlanmaq, Almaniyanın aparıcı klinikaları ilə Azərbaycanın tibb müəssisələri arasında elmi-klinik əməkdaşlığı genişləndirmək imkanlarını ətraflı müzakirə etdik. Tədbirin ən mühüm cəhəti onun Şanlı Qələbəmizin ildönümünə həsr olunmasıdır. Noyabrın 8-də 100-dən çox azərbaycanlı mütəxəssis əllərində üçrəngli bayrağımızla Berlin küçələrində Zəfər Gününü qeyd edəcək, ardından təntənəli mərasim keçiriləcək. Hesab edirəm ki, bu tədbir ölkələrimiz arasında tibbi əlaqələrin genişlənməsində, həkimlərimizin Azərbaycana inteqrasiyasında və dünyadakı yeniliklərin səhiyyəmizə gətirilməsində xüsusi rol oynayacaq”. Elvin Mövsüm AZƏRTAC-ın xüsusi müxbiri Berlin
