Bakı, 7 noyabr, AZƏRTAC Azərbaycan xalqının tarixində əbədi yaşayacaq Zəfər salnaməsi Vətən sevgisinin, milli birliyin və qəhrəmanlığın təcəssümüdür. 8 Noyabr – Zəfər Günü xalqımızın qürurunu, torpaqlarımızın azadlığı uğrunda canından keçən şəhidlərimizin müqəddəs xatirəsini yaşadır. Bu tarixi Qələbənin arxasında Vətənini hər şeydən üstün tutan, öz həyatını xalqının gələcəyinə fəda edən igid oğullarımızın şücaəti dayanır. Onlardan biri də Vətən müharibəsi şəhidi Aşur Cəmiyevdir.AZƏRTAC-a açıqlamasında şəhidin atası Bəybala Cəmiyev oğlunun vətənpərvərliyindən, hərbi xidmətə olan sevgisindən və döyüşlərdə göstərdiyi fədakarlıqdan danışıb. Qeyd edib ki, bu Zəfər hər bir azərbaycanlı üçün qürur mənbəyidir. Atanın sözlərinə görə, Aşurun Vətənə bağlılığı hələ uşaqlıq illərindən özünü göstərib. O, məktəbə ilk başladığı vaxtlardan Azərbaycan Bayrağına xüsusi sevgi bəsləyib. Sinif yoldaşının partasında bayraq gördükdə özünün də bayrağının olmasını istəyib. Əmisinin ona aldığı bayrağı məktəbə apararaq partasının üzərinə qoyması isə ailəsinin yaddaşında qalan unudulmaz xatirələrdəndir. O qeyd edib ki, oğlunun bayrağa olan sevgisi zaman keçdikcə Vətənə xidmət etmək arzusuna çevrilib. Aşur böyüdükcə hərbçi olmaq istədiyini dəfələrlə dilə gətirib. Atası əvvəlcə bu seçimin məsuliyyətini ona anlatmağa çalışsa da, oğlunun qətiyyəti qarşısında onun arzusuna hörmətlə yanaşıb. “Aşur mənə deyirdi ki, ata, mən də o aslanlardan biri olacağam. Bu sözləri eşidəndə həm sevinir, həm də onun gələcəyi barədə düşünürdüm. O, hərbçi olmaq qərarından dönmürdü. Mənə söz vermişdi ki, başımı həmişə uca edəcək. Bu gün onun Vətən qarşısında borcunu şərəflə yerinə yetirməsi, adının qəhrəman kimi çəkilməsi həmin sözün necə böyük məsuliyyət daşıdığını göstərir”, – deyə şəhid atası bildirib. Onun sözlərinə görə, Aşur hərbi xidmətə qəbul olunmaq üçün sənədlərini özü hazırlayıb və məqsədinə çatmaq üçün israrlı olub. Hərbi xidmət zamanı üzərinə düşən vəzifələri layiqincə yerinə yetirib, Vətənə sədaqətlə xidmət edib. Şəhid atası vurğulayıb ki, oğlunun döyüşlərdə iştirak etmək qərarı da onun Vətən sevgisindən irəli gəlib. Aşurun ailəsində üç övladının olmasını xatırladaraq döyüşlərə getməməsi barədə deyilənlərə baxmayaraq, o, Vətənin çağırışına biganə qala bilməyəcəyini bildirib. “Deyirdi ki, Vətən məni çağırırsa, getməliyəm. Onun bu qərarı bizim üçün asan olmasa da, Vətənə olan sevgisi hər şeydən üstün idi. Bu gün döyüş yoldaşları onun haqqında danışanda, göstərdiyi qəhrəmanlıqları xatırladanda bir ata kimi qürur hissi keçirirəm. Oğlumun yoxluğu qəlbimizdə böyük bir boşluq yaradıb. Ancaq onun adının qəhrəman kimi yaşaması, torpaqlarımızın azadlığı uğrunda mübarizə aparması bizə təsəlli verir”.Şəhid atası bildirib ki, Zəfər Günündə Azərbaycan xalqı yalnız qazanılmış Qələbəni deyil, həm də bu Qələbə naminə canından keçən qəhrəmanlarını yad edir. Azad edilmiş torpaqlarımız, doğma yurdlarımızda dalğalanan üçrəngli bayrağımız şəhidlərin Vətənə olan sonsuz sevgisinin və xalqımızın sarsılmaz iradəsinin rəmzidir. “Bu gün torpaqlarımızın azadlığı ilə fəxr ediriksə, bu, şəhidlərimizin və qazilərimizin qəhrəmanlığı sayəsindədir. Qələbəmiz onların canı, qanı bahasına qazanılıb. Qəhrəman oğullarımızın sayəsində başımız ucadır. Şəhidlərimizin ruhu qarşısında baş əyir, qazilərimizə cansağlığı arzulayıram. Allah dövlətimizi, ordumuzu qorusun. Bayrağımız daim azad səmalarda dalğalansın, şəhidlərimizin adları xalqımızın yaddaşında əbədi yaşasın”. O vurğulayıb ki, Zəfər Gününün mənəvi dəyəri gənc nəslə Vətən sevgisini, milli qüruru və şəhidlərimizin əmanətinə sədaqəti aşılamaqla daha da artır. Onun sözlərinə görə, Aşur kimi igidlərin həyat yolu hər bir azərbaycanlı üçün örnəkdir. Şəhid Aşur Cəmiyevin ömür yolu bir daha göstərir ki, Vətən sevgisi insanın qəlbində uşaqlıqdan kök salan, zaman keçdikcə əqidəyə və amalına çevrilən müqəddəs duyğudur. Bu gün Azərbaycan xalqı Zəfərini qürurla qeyd edərkən torpaqlarımızın azadlığı uğrunda canından keçən qəhrəmanlarını ehtiramla anır, onların adını və xatirəsini gələcək nəsillərə ötürür. Müxbir- Tünzalə Arazlı
