Bakı, 6 noyabr, AZƏRTAC Tərtər rayonunda iki nəfəri xüsusi amansızlıqla qətlə yetirməkdə təqsirləndirilən Vüqar Baxşəliyevin cinayət işi məhkəməyə göndərilib.Bu barədə AZƏRTAC-a Baş Prokurorluğun Mətbuat xidmətindən məlumat verilib.Bildirilib ki, cari il avqustun 6-da Tərtər şəhəri, Nəriman Nərimanov küçəsi, ev 38 ünvanında yerləşən fərdi yaşayış evində yanğın baş verib. Yanğın söndürüldükdən sonra həmin evdə yaşayan 1954-cü il təvəllüdlü Adilə Hüseynovanın və əri, 1941-ci il təvəllüdlü Əsgər Səmədovun üzərlərində zorakılıq əlamətləri olan kömürləşmiş meyitləri aşkar edilib.İstintaqla müəyyən olunub ki, əvvəllər məhkum edilmiş 1987-ci il təvəllüdlü Vüqar Baxşəliyev tamah məqsədilə qanunsuz olaraq onların yaşadıqları evə daxil olub, kəsici alətlə hər iki şəxsə xəsarət yetirib və evdən külli miqdarda pul vəsaitini talayıb. O, cinayətin izlərini gizlətmək məqsədilə özü ilə gətirdiyi yanacaqdan istifadə edərək, evi və zərərçəkmiş şəxsləri yandırmaqla onları xüsusi amansızlıqla qəsdən öldürməkdə şübhəli bilinir.Toplanmış sübutlar əsasında Vüqar Baxşəliyevə Cinayət Məcəlləsinin 120.2.4 (xüsusi amansızlıqla qəsdən adamöldürmə), 120.2.6 (başqa cinayəti gizlətmə məqsədi ilə qəsdən adamöldürmə), 120.2.7 (iki və ya daha çox şəxsi qəsdən öldürmə), 120.2.11 (quldurluqla əlaqədar qəsdən adamöldürmə), 181.3.3 (quldurluq) və 186.2.2-ci (yandırmaqla əmlakı qəsdən məhvetmə) maddələri ilə yenidən ittiham elan edilib.Cinayət işi baxılması üçün Gəncə Ağır Cinayətlər Məhkəməsinə göndərilib.
