Sentyabr ayında Binance kriptovalyuta birjasının proqram tərtibatçılarından biri yeni və perspektivli vakansiyanı müzakirə etmək üçün iş müsahibəsinə dəvət alıb.
Videokonfrans formatında keçirilən ilk mərhələ heç bir şübhə doğurmayıb. İkinci görüş məşhur messencerlərdən birində baş tutub. Binance əməkdaşı burada özünü iş təklif edən şirkətin baş direktoru kimi təqdim edən şəxslə danışıb. Daha sonra texniki mütəxəssislərin işə qəbulu zamanı standart prosedur sayılan sınaq tapşırığının vaxtı çatıb. Proqramçıya müəyyən kodu iş kompüterinə yükləmək təklif edilib.
Binance-in çərşənbə axşamı verdiyi açıqlamaya görə, həmin kodun daxilində təhlükəli proqram təminatı olub. Proqram birjanın sistemlərinə daxil olub, təhlükəsizlik vasitələrindən yan keçib və nəticədə 6,3 milyard dollarlıq misli görünməmiş kiberhücuma səbəb olub. Ötən həftə baş vermiş insidentdən sonra şirkət istifadəçilərin itkilərini ödəmək üçün təcili vəsait axtarmağa məcbur qalıb.
Binance bir neçə gün davam edən araşdırmadan sonra çərşənbə axşamı hakerlərin İT infrastrukturuna necə daxil olduğuna dair ilk konkret təfərrüatları açıqlayıb. Platforma rəhbərliyi saxta iş müsahibəsinin mürəkkəb hücumun yalnız bir hissəsi olduğunu bildirib.
ABŞ Federal Təhqiqatlar Bürosu və kriptovalyuta sahəsində kibertəhlükəsizlik üzrə ixtisaslaşan müstəqil şirkətlər oğurluğa görə məsuliyyəti Şimali Koreya hakimiyyəti ilə əlaqəli haker qrupunun üzərinə qoyublar.
Pxenyan isə əvvəlki səs-küylü kibercinayətlərdə olduğu kimi, bu insidentlə də əlaqəsinin olduğunu inkar edir. Şimali Koreya lideri Kim Çen Inın nüfuzlu bacısı Kim Yo Çjon ABŞ-ni cinayəti onun ölkəsi ilə “kor-koranə əlaqələndirməkdə” ittiham edib.
Şimali koreyalı hakerlər əvvəllər də özlərini işəgötürən kimi təqdim edərək zənglər etmək üsulundan istifadə ediblər. Sentyabr ayında FTB Yaponiya, Almaniya və Avstraliyanın dövlət qurumları ilə birlikdə rəsmi xəbərdarlıq yayıb. Xəbərdarlıqda Şimali Koreyadan olan cinayətkarların proqram tərtibatçılarını və İT mütəxəssislərini məqsədli şəkildə hədəfə aldıqları bildirilirdi. Həmin vaxta qədər onların 100-dən çox ölkədə ən azı 30 min cihazı zərərli proqramla yoluxdurduğu müəyyən edilmişdi.
Fişinq kiberhücumların ən geniş yayılmış başlanğıc nöqtəsi olaraq qalır. ABŞ Kibertəhlükəsizlik və İnfrastrukturun Mühafizəsi Agentliyinin məlumatına görə, uğurlu kiberhücumların 90 faizindən çoxu məhz fişinq məktubları ilə başlayır.
Lakin Binance-ə hücumu təşkil edən şəxslərin hədəfi parol və ya kredit kartı nömrəsi oğurlayan cinayətkarlardan xeyli böyük olub. Birja nümayəndələri bu hücumun elektron məktubdakı zərərli keçidə adi klikləmədən qat-qat mürəkkəb və incə şəkildə təşkil edildiyini vurğulayıblar.
“Bu, baş verməməli idi. İstifadəçilərimizin, tərəfdaşlarımızın və ümumilikdə sektorun üzləşdiyi narahatlıq, fəaliyyət pozuntuları və qeyri-müəyyənlik üçün səmimi üzr istəyirik”, Binance-in ilkin bəyanatında bildirilib.
Şirkət əlavə edib ki, ilk onlayn müsahibə zamanı saxta işəgötürən sosial şəbəkədə şəxsi video və fotoşəkillərin yer aldığı hesab nümayiş etdirib. Sosial mühəndisliyə əsaslanan bu yanaşma əvvəllər qeydə alınan üsullardan daha təkmil və aldadıcı olub.
Hakerlər ilk boşluğu hələ iyun ayında aşkarlayıblar. Həmin vaxt Binance-in başqa bir proqramçısı kod yazmaq üçün istifadə edilən məşhur süni intellekt alətini quraşdırmağa çalışarkən adi proqram quraşdırma vasitəsi kimi maskalanmış zərərli proqramı təsadüfən yükləyib. Binance bildirib ki, təhlükəsizlik xidməti həmin vaxt anomaliyanı vaxtında aşkar edib, əməkdaşın noutbukunu dəyişdirib və sistemlərə əlavə müdaxilənin qarşısını almaq üçün giriş açarlarını yeniləyib.
Bununla belə, cinayətkarlar həmin mütəxəssisin hansı işə cavabdeh olduğunu öyrənə biliblər. O, hesabları idarə edən kriptovalyuta pulqabıları infrastrukturuna xidmət göstərən komandada çalışırdı. Hakerlər əməkdaşın həmkarlarının kimliyini də müəyyənləşdiriblər.
Sentyabr ayında iş müsahibəsinə qatılan ilk mühəndisin noutbukuna düşən zərərli kod da yüksək mürəkkəbliyi ilə fərqlənib. Proqram şübhəli fəaliyyəti gizlədə və sistemdəki izlərini silə bilirdi. Əməkdaşın iş kompüteri ələ keçirildikdən sonra hücumçular şirkətin daxili süni intellekt alətindən istifadə ediblər. Onlar oktyabrın 20-də bu alətin köməyi ilə daha iki əməkdaşın noutbukuna nəzarəti ələ keçiriblər. Həmin şəxslərdən biri cihazı iyun ayında hücuma məruz qalan proqramçı olub.
Binance-in təhlükəsizlik sistemləri tərəfindən aşkarlanmayan hakerlər ötən cümə axşamı vəsaitləri çıxarmağa başlayıblar. Birjanın hesablarından milyardlarla dolları boşaltmaq üçün onlara cəmi 20 dəqiqəyə yaxın vaxt lazım olub.
Binance nümayəndələri əlavə ediblər ki, şirkət cari il ərzində Şimali Koreya ilə əlaqələndirilən daha 57 potensial kibertəhlükəni aşkarlayaraq qarşısını alıb. Birja öz ehtiyatları hesabına müştərilərin itkilərinin ödənilməsi prosesinə artıq başlayıb. Şirkət çərşənbə axşamı zərər çəkmiş aktivlərin 98 faizini bərpa etdiyini açıqlayıb.