Azərbaycanda fəaliyyət göstərən 15 sığorta və təkrarsığorta şirkətinin məcmu aktivləri 2026-cı ilin üçüncü rübünün sonuna 2 milyard 255,7 milyon manata çatıb. Bu, ötən ilin eyni dövründəki 2 milyard 124,3 milyon manatla müqayisədə 131,4 milyon manat və ya 6,2% çoxdur.
Aktivlərin həcminə görə sığorta bazarının lideri Azərbaycanın həyat sığortası sahəsində fəaliyyət göstərən “PAŞA Həyat Sığorta” ASC-dir. Şirkətin aktivləri illik müqayisədə 6,8% və ya 56,2 milyon manat azalaraq 769,5 milyon manata düşüb. Buna baxmayaraq, şirkət bazarın ümumi aktivlərinin 34,1%-nə sahibdir.
İkinci pillədə Azərbaycanın qeyri-həyat sığortası sahəsində fəaliyyət göstərən “PAŞA Sığorta” ASC qərarlaşıb. Şirkətin aktivləri son bir ildə 143,3 milyon manat və ya 36,1% artaraq 539,9 milyon manata yüksəlib. Bu, bazarda ən böyük mütləq aktiv artımıdır. “PAŞA Sığorta”nın bazar payı 23,9% təşkil edib.
İlk üçlüyü Azərbaycanın təkrarsığorta sahəsində fəaliyyət göstərən “AzRe Təkrarsığorta” ASC tamamlayır. Şirkətin aktivləri 21,5% artaraq 238,8 milyon manata çatıb və ümumi bazarın 10,6%-ni təşkil edib.
Aktivlərinə görə ilk üç şirkətin ümumi aktivləri 1 milyard 548,2 milyon manat olub. Bu isə sığorta sektorunun məcmu aktivlərinin 68,6%-nə bərabərdir. Ötən ilin eyni dövründə həmin üç şirkətin bazar payı 66,8% idi.
