ABŞ Prezidenti Donald Trampın tərəfdarları İranla səkkiz aydan çoxdur davam edən müharibəni Respublikaçılar Partiyasının Konqresə aralıq seçkilərdə üzləşə biləcəyi məğlubiyyətin əsas səbəblərindən biri hesab edirlər.
Bu barədə “The Wall Street Journal” (WSJ) qəzeti Amerika liderinə yaxın mənbələrə istinadən məlumat yayıb.
Nəşrin məlumatına görə, Ağ Ev administrasiyasının bəzi nümayəndələri və respublikaçıların tərəfdarları İrana qarşı hərbi əməliyyatlara başlamaq qərarını səhv addım kimi qiymətləndirirlər.
Onların fikrincə, müharibə bir neçə ay əvvəl başa çatsaydı, seçkilərin nəticələri tamamilə fərqli ola bilərdi.
Mənbələr bildirirlər ki, davam edən hərbi əməliyyatlar enerji daşıyıcılarının qiymətlərinin kəskin artmasına səbəb olub. Bu isə seçicilər arasında narazılığı gücləndirib və Respublikaçılar Partiyasının mövqelərinə mənfi təsir göstərib.
WSJ yazır ki, müharibənin siyasi və iqtisadi nəticələri fonunda Tramp administrasiyası daxilində qarşılıqlı ittihamlar başlayıb.
Bəzi rəsmilər prezidentin İranla bağlı vəziyyəti qiymətləndirdikdən sonra administrasiyada kadr dəyişiklikləri aparmaq ehtimalını da istisna etmirlər.
Qəzetin məlumatına əsasən, Trampın həm administrasiya daxilindəki, həm də kənardakı müşavirləri xəbərdarlıq edirlər ki, onun siyasi irsi artıq ABŞ və İsrailin fevral ayında İrana qarşı başladığı müharibə ilə sıx bağlı olacaq.