Polşa Seyminin (parlamentin aşağı palatası) vitse-spikeri Şimon Xolovnya Prezident Karol Navrotski və Baş nazir Donald Tusku Konstitusiya Məhkəməsinin yenidən qurulması ilə bağlı mümkün qədər tez razılığa gəlməyə çağırıb.
Bu barədə o, X sosial şəbəkəsində yazıb.
“Prezident və Baş naziri mümkün qədər tez, elə bu gün masa arxasında əyləşərək Konstitusiya Məhkəməsinin yenidən qurulması barədə razılığa gəlməyə çağırırıq”, - o bildirib.
Xolovnyanın sözlərinə görə, Konstitusiya Məhkəməsindəki vəziyyət təcili müdaxilə tələb edir: “Amma problemin güc yolu ilə həll edilməsi xəstənin vəziyyətini daha da ağırlaşdırır və məhkəmənin tənəzzülünü dərinləşdirir”.
O, həmçinin Navrotskinin məhkəmənin binasına daxil olmağa çalışarkən hakimlərlə qarşıdurmaya girməsini tənqid edib: “Bu, bizim imicimizi zədələyir”.
Polşada siyasi böhran Baş nazir Donald Tuskun öz hökumətinin keçmiş üzvü Maçey Bereki Konstitusiya Məhkəməsinin hakimi təyin etməsindən sonra başlayıb. Son həftələrdə məhkəmənin binası qarşısında mütəmadi olaraq etiraz aksiyaları keçirilir.
Oktyabrın 30-da ölkənin ədliyyə naziri Valdemar Jurek Konstitusiya Məhkəməsinin sədrinin səlahiyyətlərini müvəqqəti icra edən Boqdan Sventçkovskinin vəzifəsindən kənarlaşdırılması və toxunulmazlığının ləğv edilməsi barədə vəsatət qaldırıb.
Məhkəmənin ərazisinin mühafizəsinə əlavə polis qüvvələri cəlb olunub. Oktyabrın 31-nə keçən gecə etirazçılar məhkəmənin binası qarşısına toplaşaraq hasarı aşmağa cəhd ediblər. Polis üç nəfəri saxlayıb.
Böhranın kəskinləşməsi fonunda Navrotski Seneqala səfərini yarımçıq dayandıraraq Varşavaya qayıdıb. Bundan sonra gecə yarısı radələrində prezident Konstitusiya Məhkəməsinin binasına gələrək içəri daxil olub. Bu zaman dövlət başçısının binaya daxil olmasına mane olmağa çalışan hakimlərlə onun arasında qarşıdurma baş verib. Polislə prezidentin mühafizə xidmətinin əməkdaşları arasında da toqquşma yaşanıb.
Bir sıra müxalifət siyasətçiləri baş verənləri “dövlət çevrilişinə cəhd” kimi qiymətləndiriblər.