“Kiçik kəndlərdən birində belə bir mənzərənin şahidi oldum. Orada insanların imkanları məhdud olsa da, hamı əylənirdi. Çünki kəndin mərkəzində çox sadə, köhnəlmiş və yararsız vəziyyətdə olan bir meydança var idi. Buna baxmayaraq, insanlar orada birlikdə vaxt keçirir, əylənirdilər”.
Bunu VII Ümumdünya Mədəniyyətlərarası Dialoq Forumunda Birləşmiş Millətlər Təşkilatının Qlobal İdman Proqramının təmsilçisi Mr. Yik Wai Chee dedi.
Onun sözlərinə görə, məhz bu təcrübə ona bir həqiqəti dərk etdirdi:
“Sadə bir idman meydançası, kiçik bir icma üçün böyük əhəmiyyət daşıya bilər. Belə bir layihə çox böyük maliyyə tələb etmir, lakin ən çətin şəraitdə, hətta şəhərlərdə rahat həyat yaşayan insanların təsəvvür etməkdə çətinlik çəkəcəyi vəziyyətlərdə belə, insanları bir araya gətirə bilər. Bu təəssüratla oradan ayrıldım. Təxminən üç ay gözlədikdən və daha bir ay Londona səfər etdikdən sonra geri qayıtdım və yeni bir qeyri-kommersiya layihəsinə başladım”.
O məqsədinin Cənub-Şərqi Asiyada, xüsusilə Malayziyadan başlayaraq regionun digər ölkələrinə qədər kənd yerlərində idman infrastrukturunun yaradılması yanaşmasını dəyişdirmək olduğunu vurğuladı.
“Əsas məqsədimiz kənd icmalarında və yerli idarəetmə orqanlarının sərəncamında olan, lakin hər zaman istifadə edilməyən mövcud məkanları çoxfunksiyalı idman obyektlərinə çevirmək üçün onlayn kraudfandinq platforması yaratmaq idi. Məsələn, böyük bir zalda yerləşən iclas otağını götürək. Bu otaq bəzən həftədə cəmi bir dəfə istifadə olunur. Bəs niyə həmin məkandan badminton və ya voleybol meydançası kimi istifadə etməyək? Xüsusilə də nəzərə almalıyıq ki, kənd yerlərində özəl investisiyalara çıxış imkanları çox vaxt məhdud olur. Buna görə də mövcud resurslardan daha səmərəli istifadə etmək vacibdir. Mən bir neçə il bu layihə üzərində çalışdım. İdman infrastrukturuna xüsusi marağım var idi, çünki həqiqətən inanırdım ki, infrastruktur insanların həyatını çox geniş miqyasda dəyişə bilər. Bu yolla yalnız az sayda insana deyil, çox böyük insan qruplarına müsbət təsir göstərmək mümkündür.
Bu düşüncə ilə özüm üçün yeni bir çağırış qəbul etməyə çalışdım. 2022-ci ildə böyük şans əldə etdim: Mərakeşdə keçirilən BMT-nin Dayanıqlı İnkişaf Məqsədləri forumunda Dünya İqtisadi Forumu ilə əlaqəli nümayəndə kimi iştirak etmək üçün seçildim. Orada müxtəlif ideyalarla tanış oldum və artıq bu sahədə çalışan, təcrübələrini bölüşən insanlardan çox şey öyrəndim. Bu, mənim üçün olduqca vacib bir təcrübə idi. Həmin təcrübədən sonra özümü rahatlıq zonamdan çıxarmağa, fərqli işlər görməyə və cəmiyyətə daha böyük təsir göstərməyə çalışdım”, - deyə sonlandırdı.