Düyü dünyada ən çox istifadə edilən qarnirlərdən biridir. Ət, balıq, tərəvəz və müxtəlif souslarla mükəmməl uyğunlaşır. Lakin adi düyünü daha dadlı və ətirli hazırlamaq üçün çoxlarının bilmədiyi sadə üsul var. Bunun üçün su əvəzinə toyuq bulyonundan istifadə etmək kifayətdir.
Xarici mediaya istinadən, bu üsul düyünün dadını daha zəngin edir, ona xoş ətir və iştahaçan görünüş verir.
Mütəxəssislərin sözlərinə görə, bu bişirmə üsulu Asiya mətbəxinin məşhur Haynan toyuğu yeməyindən ilhamlanıb. Həmin yeməkdə düyü toyuq bulyonu və yağı ilə bişirilir.
Düyünü niyə bulyonda bişirmək lazımdır?
Düyü bişərkən mayeni özünə çəkir. Buna görə də istifadə edilən mayenin dadı hazır yeməyə birbaşa təsir göstərir. Adi suda bişirilən düyü neytral dada malik olur.
Toyuq bulyonu isə ona daha zəngin ətir və yüngül ət dadı verir. Bu üsulun əsas üstünlüklərindən biri də əlavə vaxt tələb etməməsidir. Xüsusi souslar hazırlamağa və çoxlu ədviyyatdan istifadə etməyə ehtiyac yoxdur.
Toyuq bulyonunda düyü necə bişirilir?
Bunun üçün yasəmən düyüsü, uzun dənəli və ya digər ağ düyü növlərindən istifadə etmək mümkündür.
Lazım olan ərzaqlar:
- 1 stəkan düyü
- 1-1,25 stəkan toyuq bulyonu (düyünün növündən asılı olaraq miqdar dəyişə bilər)
- Kiçik parça kərə yağı
- Zövqə görə duz
- İstəyə uyğun sarımsaq və ya zəncəfil
Hazırlanma qaydası
Əvvəlcə düyünü soyuq su ilə bir neçə dəfə yuyun. Su şəffaflaşana qədər bu prosesi təkrarlayın. Beləliklə, artıq nişasta təmizlənəcək və düyü daha dənəvər alınacaq. Daha sonra toyuq bulyonunu hazırlayın. Evdə hazırlanmış bulyondan istifadə etmək daha zəngin dad əldə etməyə imkan verir.
Hazır bulyon seçirsinizsə, tərkibində duzun az olmasına diqqət yetirin. Yuyulmuş düyünü qalın dibli qazana tökün və üzərinə bulyon əlavə edin. İstəyə görə az miqdarda kərə yağı, xırdalanmış sarımsaq və ya zəncəfil də qata bilərsiniz. Maye qaynayana qədər gözləyin. Daha sonra ocağın altını azaldın və qazanın qapağını bağlayın. Düyünü seçdiyiniz növün bişirmə müddətinə uyğun hazırlayın. Bişirmə zamanı düyünü qarışdırmamaq və qazanın qapağını tez-tez açmamaq məsləhətdir.
Düyü hazır olduqdan sonra qazanı ocaqdan götürün və 5–10 dəqiqə qapağı bağlı vəziyyətdə saxlayın. Daha sonra çəngəllə yüngülcə qarışdıraraq dənələrini ayırın.
Hansı bulyon daha yaxşıdır?
Toyuq bulyonu düyüyə yumşaq və xoş ət dadı verdiyi üçün ən universal seçim hesab olunur. Tərəvəz bulyonu ətsiz yeməklərə üstünlük verənlər üçün uyğundur. Xüsusilə sobada bişmiş tərəvəzlərlə təqdim edilən düyünün dadını zənginləşdirir. Mal əti bulyonu isə daha güclü və intensiv dada malikdir. Bu səbəbdən ətli yeməklərlə təqdim edilən qarnirlər üçün münasibdir.
Bulyonda bişmiş düyünü nə ilə yemək olar?
Bu üsulla hazırlanan düyü sobada bişmiş toyuq, hinduşka, balıq, tərəvəz yeməkləri və yumurta ilə yaxşı uyğunlaşır. Əgər əsas yemək yağlı və sousludursa, düyüyə əlavə kərə yağı qatmaq lazım deyil. Daha sadə yeməklər üçün isə az miqdarda sarımsaq, zəncəfil və kərə yağı dadı zənginləşdirə bilər.
Mütəxəssislər bildirirlər ki, su əvəzinə bulyondan istifadə etmək adi düyünü daha dadlı yeməyə çevirməyin ən asan yollarından biridir. Bunun üçün nə xüsusi avadanlığa, nə də bahalı ərzaqlara ehtiyac var.