Qəbələ, 27 oktyabr, AZƏRTAC Azərbaycanda su ehtiyatlarından səmərəli istifadə edilməsi, mövcud su mənbələrinin qorunması və su təminatının yaxşılaşdırılması məqsədilə yeni su anbarlarının tikintisi istiqamətində tədbirlər həyata keçirilir.AZƏRTAC xəbər verir ki, bunu Azərbaycan Dövlət Su Ehtiyatları Agentliyinin (ADESA) rəsmisi Akif Quliyev deyib.Onun sözlərinə görə, müvafiq dövlət proqramları və tapşırıqları çərçivəsində su anbarlarının inşası ilə yanaşı, suvarma kanallarının və digər meliorasiya-irriqasiya obyektlərinin tikintisi və yenidən qurulması da diqqət mərkəzində saxlanılır.Akif Quliyev qeyd edib ki, Yengicə su anbarı Qəbələ rayonunda kənd təsərrüfatı torpaqlarının suvarma suyu ilə təminatının yaxşılaşdırılmasına yönəlib. Bununla yanaşı, Oğuz rayonu ərazisində Ələcərçay su anbarının tikintisi də nəzərdə tutulur. Ələcərçay su anbarının 34 min hektar kənd təsərrüfatı təyinatlı torpağın suvarılmasına və 49 min nəfərin içməli su ilə təmin olunmasına xidmət etməsi planlaşdırılır.O bildirib ki, su ehtiyatlarının düzgün idarə edilməsi yalnız yeni anbarların tikintisi ilə məhdudlaşmır. Mövcud su anbarlarında suyun toplanması, istifadəsi və çaylara buraxılması da mütəmadi nəzarət tələb edir. Su ehtiyatlarının səmərəli idarə olunması, infrastrukturun müasirləşdirilməsi və su itkilərinin azaldılması gələcəkdə su risklərinin minimuma endirilməsi baxımından mühüm əhəmiyyət daşıyır. Müəllif - Vüqar Qurbanoğlu Videooperator - Mirrəsul Cəfərov