Bakı, 12 noyabr, AZƏRTAC Peşəkar balet artisti tamaşaçının səhnədə gördüyü yüngüllük və gözəlliyə nail olmaq üçün böyük zəhmət sərf edir. Bu, gündəlik əməyin nəticəsidir. Yüksək nəticəyə yalnız əzmkarlıq və işə bütün gücünü sərf etmək sayəsində nail olmaq mümkündür.Bunu Xalq artisti, balet truppasının rəhbəri vəzifəsini icra edən Gülağası Mirzəyev AZƏRTAC-ın müxbiri ilə söhbətində deyib.Onun sözlərinə görə, çətinliklər təlimə başladığı ilk gündən səhnə fəaliyyətini başa vurduğu vaxta qədər artisti müşayiət edir. Bu çətinliklərin bir çoxu pərdə arxasında qalır. Çünki tamaşaçıya, ilk növbədə, balet sənətinin gözəlliyi təqdim olunur. “Çıxışa hazırlaşarkən eyni hərəkət kombinasiyalarını dəfələrlə təkrarlamaq lazım gəlir. Buna görə də tamaşayadək qüvvəni tam bərpa etmək həmişə mümkün olmur. Belə anlarda məsuliyyət hissi və artistin sanki səhnədən aldığı enerji köməyə çatır. O, başa düşür ki, tamaşaçıları məyus etməyə haqqı yoxdur”, – deyə G.Mirzəyev bildirib.O, həmçinin mürəkkəb xoreoqrafik quruluşun mənimsənilməsi üçün tələb olunan vaxtın həm nömrənin xüsusiyyətlərindən, həm də ifaçının imkanlarından asılı olduğunu deyib. “Bir artist hər hansı partiyanı asanlıqla mənimsəyə bilər və bunun üçün ona bir neçə həftə kifayət edər. Digər artist isə həmin məqsədə illərlə çalışaraq nail olar. Nömrə nə qədər mürəkkəbdirsə, onun hazırlanmasına bir o qədər çox vaxt tələb olunur”, – deyə müsahibimiz izah edib. G.Mirzəyevin sözlərinə görə, balet artistinin peşəsində gündəlik rejimə riayət etmək vacibdir. Buraya müntəzəm məşqlər, düzgün qidalanma, istirahət və fiziki yüklənmədən sonra bədənin bərpası daxildir. Bundan başqa, artistlər peşələrinə görə çox vaxt şəxsi asudə vaxtlarından və bayram günlərindən imtina etməli olurlar. Çünki onların çıxışları tez-tez bayram günlərinə təsadüf edir.“Gündəlik rejim uğuru və peşəkar inkişafı müəyyən edir. Müntəzəm məşqlər daha da inkişaf etməyə kömək edir, düzgün qidalanma və istirahət isə fiziki formanı qorumaq və orqanizmin bərpası baxımından vacibdir. Tamaşaçıların asudə vaxtlarını teatrda keçirə bilmələri üçün artistlər tez-tez bayram günlərində də çalışırlar”, – deyə o qeyd edib.G.Mirzəyev gənc azərbaycanlı balet artistlərinin üzləşdiyi əsas problemlər sırasında güzəştli şərtlərlə pensiyaya çıxmaq məsələsinin həllini tapmamasını, əməkhaqlarının nisbətən aşağı olmasını, zədələrdən sonra reabilitasiya prosesində çətinlikləri və mənzil problemini göstərib.“Təəssüf ki, bizim peşədə zədələr qaçılmaz olur. Buna görə də artistlərin tam reabilitasiya keçmək imkanı olmalıdır. Mənzil məsələsi də aktuallığını qoruyur. Təxminən yarım əsr əvvəl dövlət artistləri mənzillə təmin edirdi və bu gün də onların yaşadığı həmin evlər mövcuddur”, – deyə o fikrini yekunlaşdırıb. Müsahibimizin sözlərinə görə, Azərbaycan balet məktəbi dünyanın bir çox digər balet məktəbləri kimi, rus baletinin ənənələri əsasında formalaşıb. Bu təməl ilk azərbaycanlı balerina Qəmər Almaszadəyə ölkədə balet sənətini yeni səviyyəyə yüksəltməyə imkan verib.“Bu gün Azərbaycan baleti özünəməxsusluğu, zərifliyi və temperamentliliyi ilə seçilir. Gənclərin bu peşəyə cəlb olunması üçün şərait yaratmaq və balet truppamızı xarici ölkələrdə daha fəal tanıtmaq vacibdir. Bu, dünyanı muğam və milli rəqslə yanaşı, Azərbaycanın daha bir sərvəti – balet sənəti ilə də tanış etməyə imkan verəcək”, – deyə G.Mirzəyev vurğulayıb. Müxbir – Günel Alıyeva
