Bakı, 11 noyabr, AZƏRTAC Ölkə iqtisadiyyatı dünyada mövcud olan qeyri-müəyyənlik fonunda yüksək dayanıqlılıq nümayiş etdirməkdədir.Prezident İlham Əliyevin də söylədiyi kimi, iqtisadiyyatın şaxələnməsi hədəfimizin əsasını təşkil edir. Qeyri-neft sektoru iqtisadi artımın əsas hərəkətverici qüvvəsinə çevrilib.AZƏRTAC xəbər verir ki, bunu parlamentin Hüquq siyasəti və dövlət quruculuğu, Müdafiə, təhlükəsizlik və korrupsiya ilə mübarizə, İnsan hüquqları, Regional məsələlər komitələrinin birgə iclasında Hüquq siyasəti və dövlət quruculuğu komitəsinin sədri Əli Hüseynli bildirib. O bildirib ki, növbəti ildə hərbi, hərbi sənaye kompleksinin inkişafı, Qarabağın və Şərqi Zəngəzurun bərpası ilə bağlı işlər üçün kifayət qədər vəsait ayrılıb. Bununla yanaşı, təqdirəlayiq haldır ki, dövlətimiz vətəndaşlarımızın həssas təbəqəsinin rifah halının yaxşılaşdırılması üçün də kifayət qədər büdcə nəzərdə tutub. Ə.Hüseynli qeyd edib ki, 2027-ci ilin dövlət büdcəsində məhkəmə hakimiyyəti, hüquq-mühafizə orqanları, ədliyyə orqanlarının saxlanması üçün kifayət qədər vəsait ayrılıb. Müqayisə etsək görərik ki, bu, 2026-cı ilə müqayisədə 3 faiz, 2025-ci illə isə müqayisədə hətta 17 faiz çoxdur. Fotoqraf - Aydın Məmmədov
