Bakı, 7 noyabr, AZƏRTAC "Kəpəz" klubunda 8 Noyabr - Zəfər Günü münasibətilə Vətən müharibəsi iştirakçıları ilə görüş keçirilib.Gəncə təmsilçisindən AZƏRTAC-a bildirilib ki, görüşdə "Kəpəz"in İctimai Birliyinin İdarə Heyətinin sədri Anar Abdullayev, İdarə Heyətinin üzvü Umud Tarverdiyev, həmçinin II Qarabağ Müharibəsi zamanı torpaqlarımızın azadlığı uğrunda döyüşlərdə iştirak edən "Kəpəz" Futbol Akademiyasının U-13 komandasının baş məşqçisi Talıb Rzayev və digər şəxslər iştirak ediblər.Anar Abdullayev onlara dövlətimizin ərazi bütövlüyü uğrunda yağı düşmənlə qanlı mübarizədə göstərdikləri şücaətə görə minnətdarlığını bildirib. O, 44 gün ərzində qazanılan qələbənin yalnız hərbi uğur deyil, həm də xalqımızın sarsılmaz iradəsinin, milli birliyinin, dövlətə və Vətənə bağlılığının təntənəsi olduğunu diqqətə çatdırıb: "Prezident, Müzəffər Ali Baş Komandan İlham Əliyevin rəhbərliyi ilə uzun illər ərzində həyata keçirilən məqsədyönlü və uzaqgörən siyasətin nəticəsi olaraq şanlı ordumuz 44 gün ərzində zəfər qazandı. Qəhrəmanlıq salnaməsini yazan qeyrətli oğullarımız hamıya nümunədir, iftixar və qürur mənbəyidir. Vətənimizin azadlığı və suverenliyi uğrunda həyatını qurban verənlərə Allahdan rəhmət diləyir, qazilərə cansağlığı arzulayırıq".Vaxtilə futbolçu qismində "Kəpəz"in şərəfini qorumuş, hazırda akademiyada çalışan Talıb Rzayev Zəfər Gününün gələcək nəsillər üçün əmanət olduğunu söyləyib: "Həmin ərəfədə hamıda ruh yüksəkliyi var idi, illər ərzində yığılıb qalan qisas hissi ilə alışıb-yanırdıq. Cəbhə xəttində bir an olsa belə nikbinliyimizi itirmədik və nəticədə tarixi qələbə qazandıq". Görüşün sonunda Anar Abdullayev qazilərə hədiyyələr bağışlayıb.
