Bakı, 6 noyabr, AZƏRTAC 2020-ci il sentyabrın 27-də başlayan Vətən müharibəsi Azərbaycan xalqının birliyini, Ordumuzun gücünü və əsgər-zabitlərimizin misilsiz qəhrəmanlığını bütün dünyaya nümayiş etdirdi. 44 gün davam edən müharibədə Vətənimizin ərazi bütövlüyü uğrunda canından keçərək adını tariximizə yazan igidlərimizdən biri də Vətən Müharibəsi Qəhrəmanı, şəhid polkovnik-leytenant Anar Əliyevdir. Döyüşlərdə göstərdiyi şücaət, peşəkar hərbçi və cəsur komandir kimi fəaliyyəti ilə seçilən Anar Əliyev qəhrəmanlığı ilə xalqımızın yaddaşında əbədi yer tutub. Vətən Müharibəsi Qəhrəmanı Anar Əliyevin qızı, Bakı Dövlət Univesitetinin Tarix fakültəsinin II kurs tələbəsi Nigar Əliyeva AZƏRTAC-a müsahibəsində atasının döyüş yolundan, Vətənə və doğma Kəlbəcərə bağlılığından, eləcə də onunla bağlı unudulmaz xatirələrindən danışıb. O, atasının ailədə qayğıkeş, mehriban insan, hər kəsin güvən yeri olduğunu bildirib. N.Əliyeva atasının hərbçi kimi də peşəkarlığı və cəsarəti ilə seçildiyini, daim ön sıralarda olan komandir olduğunu vurğulayıb. Onun sözlərinə görə, əslən Kəlbəcərdən olan atasının ən böyük arzularından biri doğma torpağına Azərbaycan bayrağını sancmaq idi: “Vətən anlayışı onun üçün, bəlkə də, ilk növbədə Kəlbəcər demək idi. Atam Kəlbəcər azad olunduqdan sonra bizimlə birlikdə doğma yurduna gedəcəyini, oranın hər qarışını ailəsi ilə birgə gəzəcəyini düşünürdü. Təəssüf ki, bu, ona qismət olmadı. Ancaq arzusu gerçəkləşdi, onun adına Kəlbəcərə bayraq sancıldı və bu gün həmin torpaqlarımız azaddır. Mən Qarabağa dəfələrlə səfər etmişəm. Hər dəfə oraya gedəndə elə hiss edirəm ki, atam yanımdadır”. O, atasının Kəlbəcərlə bağlı xatirələrini ailəsi ilə tez-tez bölüşdüyünü, doğma yurdlarındakı evlərindən və orada keçirdiyi günlərdən böyük sevgi ilə danışdığını xatırlayıb. Sonradan ailə üzvləri də həmin yerlərə səfər edib, ata evlərini görüblər. Hazırda isə evdən yalnız daşlar qalıb. Atası ilə son görüşünü xatırlayan Nigar Əliyeva bildirib ki, 2020-ci il oktyabrın 11-də Anar Əliyev müharibəyə yollanıb. Həmin gün günorta saatlarında evə gələrək bəzi əşyalarını götürüb tələsik getdiyini deyən müsahibimiz atasının döyüşlərə qatılacağını ailəsinə bildirmədiyini söyləyib: “Həmin an bunun son görüşümüz olduğunu bilmirdim. Bu, ömrümün ən ağır xatirələrindən biridir”. O, müharibə zamanı atası ilə cəmi bir dəfə telefonla danışa bildiyini, həmin söhbətdə onun səsinin yorğun gəldiyini, döyüşlərin gərginliyinin hiss olunduğunu qeyd edib. N.Əliyeva atasının Xocavənd rayonunun Tuğ kəndi istiqamətində gedən döyüşlərdə şəhid olduğunu bildirib. Müsahibimiz atasının şəhid olması xəbərini necə öyrəndiklərini də kövrək xatirələrlə bölüşüb. O, bu xəbəri qəbul etməyin çox çətin olduğunu, təxminən bir il ərzində atasının şəhid olması ilə barışa bilmədiyini söyləyib. Həmin dövrün həm özü, həm anası, həm də qardaşı üçün son dərəcə ağır keçdiyini vurğulayıb. Anasının kədərini və qardaşının keçirdiyi sarsıntıları görməyin ona da ağır təsir etdiyini bildirib. Xidməti dövründə Anar Əliyevin göstərdiyi rəşadəti və qarşıya qoyulmuş döyüş tapşırığını yerinə yetirdiyində qəhrəmanlığı Prezident, Ali Baş Komandan İlham Əliyev tərəfindən yüksək qiymətləndirilib. Dövlət başçısının müvafiq sərəncamları ilə polkovnik-leytenant ölümündən sonra ən yüksək fəxri ad - “Vətən Müharibəsi Qəhrəmanı” adına və bir neçə döyüş medalına, o cümlədən “Vətən uğrunda” və “Şuşanın işğaldan azad edilməsi” medallarına layiq görülüb. N.Əliyeva bu yüksək mükafatın atasının qəhrəmanlığına və hərbi peşəkarlığına verilən layiqli qiymət olduğunu bildirib: “Atamın adı hər zaman yoluma işıq salır. Getdiyim hər yerdə Anar Əliyevin qızı olduğumu söyləmək mənim üçün böyük qürurdur. Onun adını hər zaman özümlə yaşatmaq mənə güc verir. Atamın yoxluğu ilə bağlı kədərim böyükdür, amma onun qızı olmağımdan duyduğum qürur da bir o qədər böyükdür”. Müxbir-Xatirə Cəfərova
