Bakı, 4 noyabr, AZƏRTACTurizmin müxtəlif istiqamətləri arasında sağlamlıq turizmi həm iqtisadi, həm də sosial baxımdan xüsusi əhəmiyyətə malikdir. Zəngin təbii ehtiyatlar və müasir infrastruktura malik Azərbaycan bu sahədə böyük potensiala sahibdir.AZƏRTAC xəbər verir ki, bu fikirləri Dövlət Turizm Agentliyinin sədri Fuad Nağıyev 3-cü Beynəlxalq Sağlamlıq Turizmi Konfransında çıxışı zamanı deyib.F.Nağıyev diqqətə çatdırıb ki, Dövlət Turizm Agentliyinin əsas vəzifələrindən biri mövcud potensialdan səmərəli istifadəni dəstəkləmək, yüksəkkeyfiyyətli turizm məhsullarının yaradılmasına şərait yaratmaq və ölkəmizin beynəlxalq sağlamlıq turizmi bazarında tanıdılmasını genişləndirməkdir: “Sağlamlıq turizmi “Azərbaycan Respublikasında 2026–2030-cu illərdə turizmin inkişafına dair Dövlət Proqramı”nda da prioritet istiqamətlərdən biri kimi müəyyən edilib. Sənəddə sağlamlıq və tibbi turizmin inkişafına, beynəlxalq akkreditasiya imkanlarının genişləndirilməsinə, eləcə də bu sahədə davamlı əməkdaşlığın təşviqinə xüsusi yer ayrılıb. Tibbi turizmin inkişafı səhiyyə sistemi ilə turizm sektoru arasında səmərəli əlaqələrdən birbaşa asılıdır. Bu sahədə davamlı inkişafın təmin edilməsi məqsədyönlü və koordinasiyalı fəaliyyət tələb edir. Bu baxımdan Səhiyyə Nazirliyinin, aidiyyəti digər qurumların və beynəlxalq təşkilatların birgə işi xüsusi əhəmiyyət daşıyır”. Müxbir - Fidan Əlizadə