Bakı, 3 noyabr, AZƏRTAC8 Noyabr – Zəfər Günü Azərbaycan xalqının tarixində milli iradənin, dövlətçilik əzminin və tarixi ədalətin təntənəsi kimi əbədi yaşayacaq. Bu gün yalnız 44 günlük Vətən müharibəsində qazanılmış hərbi Qələbəni deyil, xalqımızın onilliklər boyu yaşadığı ağrıların, itkilərin, məcburi köçkünlük həyatının və doğma torpaqlarına qayıtmaq həsrətinin sona çatmasını ifadə edir. Zəfər Azərbaycanın öz taleyini öz iradəsi ilə müəyyənləşdirdiyi, milli ləyaqətini və dövlətçilik gücünü bütün dünyaya nümayiş etdirdiyi möhtəşəm tarixi hadisədir. Bu fikirləri AZƏRTAC-a açıqlamasında Milli Məclisin deputatı, filologiya elmləri doktoru Elnarə Akimova bildirib.Deputat vurğulayıb ki, Azərbaycanın tarixi Zəfəri təsadüfi deyil, uzun illər ərzində həyata keçirilən məqsədyönlü dövlət siyasətinin, güclü ordu quruculuğunun, iqtisadi inkişafın, milli birliyin və prinsipial diplomatiyanın məntiqi nəticəsidir. Bu yolun təməlində Ümummilli Lider Heydər Əliyevin uzaqgörən dövlətçilik fəlsəfəsi dayanır. Prezident İlham Əliyevin rəhbərliyi ilə həmin siyasi kursun uğurla davam etdirilməsi Azərbaycanın hərbi, iqtisadi və diplomatik potensialını gücləndirərək tarixi Qələbəyə zəmin yaradıb. O xatırladıb ki, 2020-ci il sentyabrın 27-də başlanan Vətən müharibəsi Azərbaycan xalqının uzun illər gözlədiyi tarixi dönüş oldu. 44 gün ərzində Azərbaycan Ordusu yüksək peşəkarlıq və qəhrəmanlıq nümayiş etdirərək torpaqlarımızı işğaldan azad etdi. Bu qələbədə Müzəffər Ali Baş Komandan İlham Əliyevin siyasi iradəsi və strateji rəhbərliyi, hərbçilərimizin şücaəti, şəhidlərimizin müqəddəs qanı, qazilərimizin fədakarlığı və xalqımızın sarsılmaz birliyi həlledici rol oynadı. “Dəmir yumruq” milli həmrəyliyin və dövlətə inamın rəmzinə çevrildi. Şuşanın azad edilməsi Zəfər tariximizin ən möhtəşəm səhifələrindən biridir. Şuşa Azərbaycanın milli kimliyini, tarixini və mənəvi dünyasını özündə yaşadan müqəddəs şəhərdir. Onun azadlığı həm hərbi, həm də mənəvi baxımdan böyük tarixi əhəmiyyət daşıyır. 2020-ci ildə ərazi bütövlüyümüzün bərpasından sonra 2023-cü ilin sentyabrında həyata keçirilən lokal xarakterli antiterror tədbirləri nəticəsində Azərbaycanın dövlət suverenliyi bütün ərazilərində tam təmin edilib. Prezident İlham Əliyevin Xankəndidə Azərbaycan Bayrağını ucaltması bu tarixi prosesin rəmzi hadisələrindən biri olub. Zəfərin əsas nəticələrindən biri də işğaldan azad edilmiş ərazilərdə həyatın yenidən canlandırılmasıdır. Böyük Qayıdış Proqramı çərçivəsində Qarabağ və Şərqi Zəngəzurda genişmiqyaslı bərpa və quruculuq işləri aparılır, müasir infrastruktur yaradılır, keçmiş məcburi köçkünlərin doğma yurdlarına qayıdışı təmin edilir. Məktəblərin, xəstəxanaların, yolların, yaşayış məntəqələrinin və digər sosial obyektlərin inşası azad edilmiş ərazilərin gələcək inkişafına xidmət edir.Onun fikrincə, Zəfər yalnız qürur günü deyil, həm də böyük məsuliyyətdir. Şəhidlərin xatirəsinin yaşadılması, onların ailələrinə və qazilərə dövlət qayğısının davam etdirilməsi, qəhrəmanlıq tariximizin gələcək nəsillərə çatdırılması hər birimizin mənəvi borcudur. O, Azərbaycanın postmünaqişə dövründə də milli maraqlarını qətiyyətlə müdafiə etdiyini, regionda sülh və əməkdaşlığın təmin olunması istiqamətində ardıcıl siyasət həyata keçirdiyini vurğulayıb. Bildirib ki, dayanıqlı sülh Azərbaycanın suverenliyinə, ərazi bütövlüyünə və beynəlxalq hüquqa hörmət əsasında qurulmalıdır. Deputat qeyd edib ki, Heydər Əliyevin müəyyənləşdirdiyi dövlətçilik strategiyası ilə Prezident İlham Əliyevin rəhbərliyi altında əldə olunan tarixi nəticələr bir-birini tamamlayır. Bu davamlı siyasi xətt Azərbaycanın müstəqilliyinin möhkəmlənməsinə, milli maraqlarının qorunmasına və tarixi Zəfərin qazanılmasına xidmət edib. O vurğulayıb ki, bu gün Qarabağda yüksələn Azərbaycan Bayrağı, yenidən qurulan şəhərlərimiz və doğma torpaqlarına qayıdan ailələrimiz Zəfərin canlı təcəssümüdür. Tarixi Qələbəmizin əsl davamı azad edilmiş ərazilərin inkişaf etdirilməsi, insanların firavan yaşayışının təmin olunması və güclü dövlətin gələcək nəsillərə ötürülməsidir.“Zəfər bizim tariximizdir, suverenlik dövlətimizin gücüdür, milli birlik isə gələcəyimizin ən böyük təminatıdır. 8 Noyabr xalqımızın yaddaşında Azərbaycanın öz taleyini öz iradəsi ilə müəyyənləşdirdiyi tarixi gün kimi əbədi yaşayacaq”, – deyə E.Akimova bildirib.
