Bakı, 2 noyabr, AZƏRTAC Azərbaycan Milli Elmlər Akademiyasının (AMEA) “Elm” nəşriyyatının direktoru, filologiya üzrə fəlsəfə doktoru Səbuhi Qəhrəmanov Qazaxıstan keçirilən “Süni zəka dövründə elm: əməkdaşlıq və inkişaf üçün yeni imkanlar” mövzusunda MDB ölkələri alimlərinin VI forumunda iştirak edib. AMEA-dan AZƏRTAC-a bildirilib ki, Almatı şəhərində təşkil olunan forumda S.Qəhrəmanov “Sosial və humanitar elmlərdə süni intellekt: cəmiyyət, mədəniyyət, təhsil və dövlət idarəçiliyi” adlı dəyirmi masada “Süni intellekt dövründə akademik nəşriyyat: yeni imkanlar və çağırışlar” mövzusunda məruzə ilə çıxış edib. O, elmi məruzəsində süni intellektin redaksiya-nəşriyyat işlərinin təşkili, elmi nəşrlərin beynəlxalq əlçatanlığının artırılması üçün geniş imkanlar yaratdığını, rəqəmsal texnologiyaların sürətli inkişafının akademik nəşriyyatın ənənəvi fəaliyyət istiqamətlərini dəyişdirərək ona yeni məzmun qazandırdığını bildirib. Həmçinin süni intellektin akademik nəşriyyata inteqrasiyasında yaranan elmi və etik çağırışlardan da danışıb. Qeyd edib ki, elmi informasiyanın etibarlılığı, müəlliflik və elmi məsuliyyət məsələlərinə ciddi diqqət yetirilməli, akademik dəyərlərin qorunması başlıca istiqamət olmalıdır. S.Qəhrəmanov AMEA-da süni intellektin elmi fəaliyyətə inteqrasiyasının aktual istiqamətlərdən olduğunu bildirib. Akademiyada süni intellektin humanitar və ictimai elmlərdə tətbiqi genişləndiyi üçün ingilis dilində “Journal of Artificial Intelligence in Humanities and Social Sciences” adlı elmi nəşrin təsis olunduğunu vurğulayıb. Əlavə edib ki, bu təşəbbüs yeni tədqiqat metodlarının müzakirəsi, fənlərarası əməkdaşlıq və beynəlxalq elmi kommunikasiyanın inkişafı üçün mühüm platforma formalaşdırmaq məqsədi daşıyır. AMEA-nın DərgiPark platforması haqqında da məlumat verən S.Qəhrəmanov bildirib ki, bu elektron resurs akademik nəşrlərin vahid rəqəmsal mühitdə toplanmasında, idarə olunmasında və elmi məqalələrin daha geniş auditoriyaya çatdırılmasında geniş imkanlar yaradır. Belə elmi platformalar müasir tədqiqat istiqamətlərinin formalaşmasına, elmi nəticələrin beynəlxalq səviyyədə müzakirəsinə və akademik nəşriyyatın rəqəmsal transformasiyasına töhfə verir. Forumun Səbuhi Qəhrəmanova sertifikat və hədiyyələr təqdim olunub.
