Bakı, 30 oktyabr, AZƏRTAC Oktyabrın 29–30-da Minskdə “Kitabxana mədəniyyət fenomeni kimi” adlı XIII Beynəlxalq Konqres keçirilir. “Qadının mədəniyyətdə rolu” mövzusuna həsr olunan tədbir Belarusun Mədəniyyət Nazirliyi və Belarus Milli Kitabxanası tərəfindən təşkil olunub. Bu barədə AZƏRTAC-a Azərbaycan Milli Kitabxanasından məlumat verilib.Bildirilib ki, konqresin proqramı qadınların mədəniyyət, elm və maarifçilik sahələrindəki rolunu, kitabxana təhsili və elminin aktual problemlərini, elektron informasiya resursları və xidmətlərinin inkişafını, habelə kitabxanaların cəmiyyət və dövlət həyatındakı mövqeyini əhatə edir. İki gün davam edən konqres çərçivəsində plenar iclaslar, tematik bölmə toplantıları, dəyirmi masalar, seminarlar və təlim-seminarlar keçirilir. Proqramda rəqəmsal kolleksiyaların yaradılması, sənədlərin rəqəmsallaşdırılması və mühafizəsi ilə bağlı praktiki təqdimatlar, həmçinin nəşriyyat məhsulları və elektron informasiya resurslarının sərgisi təqdim olunur. XIII Beynəlxalq Konqresdə Azərbaycan Milli Kitabxanasını direktor müavini, tarix üzrə fəlsəfə doktoru Ədibə İsmayılova təmsil edir. Direktor müavini “Azərbaycan Milli Kitabxanası: milli yaddaşın rəqəmsal gələcəyi” mövzusunda məruzəsində Azərbaycan Milli Kitabxanasının milli sənəd irsinin qorunması, rəqəmsal resurslarının inkişafı və informasiya xidmətlərinin əlçatanlığının genişləndirilməsi istiqamətindəki fəaliyyətini təqdim edib. Məruzədə müasir milli kitabxananın ənənəvi fondların mühafizəsi ilə yanaşı, rəqəmsal transformasiya prosesində və beynəlxalq informasiya mübadiləsindəki rolu təhlil olunub. Elektron kataloqun inkişafı və biblioqrafik yazıların hazırlanmasında süni intellekt texnologiyalarından istifadə məruzənin əsas istiqamətlərindən biri olub. Qeyd edilib ki, süni intellekt alətləri biblioqrafik məlumatların MARC 21 formatının müvafiq sahələri üzrə strukturlaşdırılmasını, ad variantlarının müəyyənləşdirilməsini, açar söz və predmet rubrikalarının seçilməsini dəstəkləyir. Bununla yanaşı, süni intellektin kitabxanaçı-biblioqrafların peşəkar fəaliyyətini əvəz etmədiyi, onun hazırladığı məlumatların məsul mütəxəssislər tərəfindən yoxlanıldığı vurğulanıb. Məruzədə nadir kitabların, dövri nəşrlərin və digər qiymətli sənədlərin rəqəmsallaşdırılmasının milli sənəd irsinin qorunması və elmi dövriyyəyə cəlb edilməsi baxımından əhəmiyyəti də nəzərdən keçirilib. Qeyd edək ki, beynəlxalq konqresdə Azərbaycan, Belarus, Qırğızıstan, Özbəkistan, Rusiya, Sloveniya, Oman, Hindistan, Çin, Kuba, Mali, Myanma, Bolqarıstan, İndoneziya və digər ölkələri təmsil edən nümayəndələr iştirak edirlər.
