Ölkələrdə ali təhsil almış insanların əhali içərisindəki payı təhsil səviyyəsini müqayisə etmək üçün əsas göstəricilərdən biri hesab olunur. İqtisadi Əməkdaşlıq və İnkişaf Təşkilatının (OECD) 2026-cı il üzrə təhsil hesabatı və Birləşmiş Millətlər Təşkilatının əhali proqnozları əsasında hazırlanan müqayisə universitet məzunlarının payının yüksək olduğu ölkələri üzə çıxarıb.
Editor.az-ın Sabah-a istinadən aldığı məlumatlar göstərir ki, nəticələr ölkələrin hansı göstərici üzrə müqayisə edilməsindən asılı olaraq dəyişir. Yetkin əhali arasında ali təhsillilərin xüsusi çəkisinə görə Kanada ilk sırada yer alır. Ümumi universitet məzunlarının sayına görə isə Çin, Hindistan və ABŞ önə çıxır.
Universitet məzunlarının əhali içərisindəki payına görə ilk 10 ölkə
- Kanada — 64%
- İrlandiya — 59%
- Yaponiya — 58%
- Cənubi Koreya — 58%
- Böyük Britaniya — 55%
- Lüksemburq — 55%
- Avstraliya — 54%
- ABŞ — 52%
- İsveç — 51%
- İsrail — 51%
Türkiyə dünya sıralamasında neçənci yerdədir?
Təqdim olunan statistikaya əsasən, Türkiyə yetkin əhalinin 28 faizinin ali təhsilli olması göstəricisi ilə dünya üzrə 37-ci yerdə qərarlaşıb.
Ölkədə universitet və digər ali təhsil müəssisələrini bitirmiş şəxslərin ümumi sayının 13,3 milyon olduğu bildirilir. Bu göstərici Türkiyənin məzunların ümumi sayına görə bir sıra Avropa ölkələrini geridə qoyduğunu, lakin əhali içərisindəki pay baxımından daha aşağı pillədə olduğunu göstərir.
Universitet məzunlarının ümumi sayına görə Çin və Hindistan öndədir
Məzunların əhali içərisindəki faizinə görə Kanada lider olsa da, ümumi say müqayisəsində mənzərə fərqlidir.
Təqdim olunan rəqəmlərə görə, Çində ali təhsilli insanların sayı təxminən 152,4 milyon, Hindistanda 119,2 milyon, ABŞ-da isə 93 milyon nəfərdir. Beləliklə, bu göstərici üzrə ilk üçlükdə əhalisi çox olan ölkələr qərarlaşıb.
Ölkələr arasındakı fərqi izah edən əsas amillərdən biri əhalinin ümumi sayıdır. Məsələn, Kanadada ali təhsil məzunlarının sayı təxminən 13,7 milyon, Türkiyədə isə 13,3 milyon nəfər göstərilir.
İki ölkənin məzun sayı bir-birinə yaxın olsa da, ali təhsillilərin yetkin əhali içərisindəki payı arasında 36 faiz bəndi fərq olduğu bildirilir.
Bu müqayisə göstərir ki, universitet məzunlarının ümumi sayı ilə əhalinin nə qədərinin ali təhsilli olması eyni göstərici deyil. Ölkələrin təhsil səviyyəsini müqayisə edərkən hər iki meyarı nəzərə almaq vacibdir.
\\ Aydan Bünyatova, Editor.az