Hər il payızda balıq ovu mövsümünün başlaması və təsərrüfatlardan bazara məhsul tədarükünün artması qiymətlərin ucuzlaşmasına zəmin yaratmalıdır. Lakin bu il fərqli mənzərə müşahidə olunur. Mövsümün qızğın vaxtı olmasına baxmayaraq, balıq və balıq məhsullarının qiymətlərində bahalaşma davam edir.
Mövzu ilə bağlı iqtisadçı Akif Nəsirli Modern.az-a açıqlamasında bildirib ki, ov mövsümünün başlaması bazarda təklifin avtomatik artması demək deyil.
Onun sözlərinə görə, qiymətlərə ovlanan balığın həcmi, hava şəraiti, balıq ehtiyatlarının vəziyyəti, daşınma və saxlanma xərcləri, eləcə də vasitəçilərin qiymət siyasəti təsir göstərir.
İqtisadçı qeyd edib ki, Azərbaycanda bütün balıq növləri üçün ov mövsümü eyni deyil. Bəzi növlərin ovlanmasına məhdudiyyətlər tətbiq olunur, digərləri üzrə isə faktiki ov həcmi gözləniləndən aşağı ola bilər. Buna görə də mövsümün başlaması qiymətlərin mütləq ucuzlaşacağı anlamına gəlmir.
Akif Nəsirli qiymətlərə təsir edən digər mühüm amilin idxal olduğunu vurğulayıb. Onun sözlərinə görə, xaricdən gətirilən balıqların qiymətinə gömrük və vergi yükü, daşınma xərcləri, valyuta məzənnəsi, eləcə də təchizatçı ölkələrdəki qiymətlər təsir edir. İqtisadçı xatırladıb ki, 2025-ci ildə də idxal balıqlarının qiymətində vergi və daşınma xərclərinin rolu müzakirə olunub.
O, balıq və balıq məhsullarının qiymətlərində illik artıma da diqqət çəkib. Rəsmi statistikaya əsasən, 2026-cı ilin sentyabrında bu məhsullar əvvəlki ayla müqayisədə 1,9 faiz, ötən ilin eyni ayına nisbətən isə 8,5 faiz bahalaşıb.
İqtisadçının fikrincə, qiymət artımını yalnız mövsümlə əlaqələndirmək düzgün deyil. Bunun səbəblərini müəyyənləşdirmək üçün ovlanan balığın faktiki həcmi, idxal göstəriciləri və bazardakı satış qiymətləri müqayisəli şəkildə təhlil edilməlidir. Mövsüm ərzində təklif artsa da, qiymətlər yüksəlməkdə davam edirsə, istehsal və tədarük xərcləri ilə yanaşı, satış zəncirində qiymətlərin formalaşması da araşdırılmalıdır.