Bakı, 13 noyabr, AZƏRTAC“Avropa Siyasi Birliyi”nin Dublin Sammiti Azərbaycanın Avropa ölkələri ilə siyasi dialoqunun genişləndirilməsi, enerji və nəqliyyat sahələrində əməkdaşlığının inkişafı, eləcə də regionda davamlı sülhün və təhlükəsizliyin təmin olunması istiqamətində həyata keçirdiyi təşəbbüslərin müzakirəsi baxımından mühüm əhəmiyyət daşıyır.Bu fikirləri AZƏRTAC-a açıqlamasında Milli Məclisin deputatı Aydın Hüseynov bildirib.Deputat qeyd edib ki, Azərbaycan Avropa ilə münasibətlərini qarşılıqlı maraqlar, bərabərhüquqlu tərəfdaşlıq və praqmatik əməkdaşlıq prinsipləri əsasında inkişaf etdirir. “Ölkəmizin Avropanın enerji təhlükəsizliyinə verdiyi töhfə, həyata keçirdiyi beynəlxalq nəqliyyat və logistika layihələri Azərbaycanın regional və qlobal miqyasda strateji əhəmiyyətini daha da artırır. Azərbaycanın enerji siyasəti Avropa ölkələri üçün xüsusi əhəmiyyət kəsb edir. Xüsusilə, Cənub Qaz Dəhlizi və onun tərkib hissəsi olan Trans-Adriatik Boru Kəməri vasitəsilə Avropa bazarlarına təbii qazın nəqlinin həyata keçirilməsi ölkəmizin etibarlı enerji tərəfdaşı kimi mövqeyini möhkəmləndirib. Bu əməkdaşlıq həm Azərbaycanın, həm də Avropa dövlətlərinin uzunmüddətli enerji maraqlarına xidmət edir”, - deyə deputat əlavə edib. A.Hüseynov vurğulayıb ki, nəqliyyat və logistika sahəsində əməkdaşlıq da Azərbaycan-Avropa münasibətlərinin mühüm istiqamətlərindən biridir: “Azərbaycanın əlverişli coğrafi mövqeyi, müasir nəqliyyat infrastrukturu və Şərq-Qərb, eləcə də Şimal-Cənub beynəlxalq nəqliyyat dəhlizlərinin inkişafına verdiyi töhfə ölkəmizi mühüm tranzit mərkəzinə çevirir. Orta Dəhlizin imkanlarının genişləndirilməsi Avropa ilə Asiya arasında yükdaşımaların səmərəliliyinin artırılması, ticarət əlaqələrinin inkişafı və yeni iqtisadi imkanların yaradılması baxımından xüsusi əhəmiyyətə malikdir”.Deputat diqqətə çatdırıb ki, Azərbaycanın Avropa ölkələri ilə siyasi dialoqunun gündəliyində regional təhlükəsizlik və sülh məsələləri də mühüm yer tutur. “Cənubi Qafqazda uzunmüddətli sabitliyin təmin edilməsi, Ermənistanla münasibətlərin normallaşdırılması və sülh sazişinin imzalanması istiqamətində Azərbaycanın irəli sürdüyü təşəbbüslər regionun gələcək inkişafı üçün yeni perspektivlər açır. Azərbaycanın mövqeyi regionda qarşıdurmanın davam etdirilməsinə deyil, əməkdaşlıq mühitinin formalaşdırılmasına, iqtisadi və nəqliyyat əlaqələrinin bərpasına, qarşılıqlı etimadın möhkəmləndirilməsinə əsaslanır. Bu baxımdan Avropa siyasi platformalarında Azərbaycanın sülh gündəliyinin və regional təşəbbüslərinin müzakirə olunması vacibdir. “Avropa Siyasi Birliyi” çərçivəsində aparılan müzakirələr Azərbaycanla Avropa dövlətləri arasında qarşılıqlı anlaşmanın gücləndirilməsi, mövcud əməkdaşlıq istiqamətlərinin genişləndirilməsi və yeni tərəfdaşlıq imkanlarının müəyyənləşdirilməsi üçün əlavə imkanlar yaradır”, - deyə A.Hüseynovun qeyd edib.Deputat bildirib ki, Azərbaycan bundan sonra da milli maraqlarına əsaslanan müstəqil xarici siyasət kursunu davam etdirəcək, Avropa ölkələri ilə qarşılıqlı faydalı əməkdaşlığın inkişafına, regionda sülhün, təhlükəsizliyin və iqtisadi tərəqqinin təmin olunmasına töhfə verəcək.
