Bakı, 4 noyabr, AZƏRTAC 2020-ci ildə Şuşanın azad olunması və tarixi Zəfərdən sonra Azərbaycan ədəbiyyatında bu mövzuya həsr olunmuş çoxsaylı bədii əsərlər və yazılar meydana çıxıb. Onların arasında yüksək bədii keyfiyyətə malik nümunələrlə yanaşı, şablon xarakterli əsərlər də var. Ədəbi müzakirələr və tənqidi yanaşmalar bu istiqamətdə yaradılan əsərlərin keyfiyyətinə müsbət təsir göstərəcək. müasir ədəbi prosesin təhlilində kitab sərgilərinin, yeni nəşrlərin və oxucu marağının öyrənilməsinin əhəmiyyətini vurğulayıb. AZƏRTAC xəbər verir ki, Azərbaycan Yazıçılar Birliyinin sədr müavini Rəşad Məcid bu fikirləri AMEA-da keçirilən “Ədəbi proses-2025” yaradıcılıq müşavirsində çıxışı zamanı səsləndirib. O bildirib ki, XII Bakı Beynəlxalq Kitab Sərgisi ona müasir nəşriyyat mühiti, müəlliflər və oxucular arasında formalaşan maraq baxımından yeni təəssüratlar yaradıb. Onun fikrincə, gələcək illərdə sərgidə təqdim olunan nəşrlər, yeni müəlliflər və oxucu marağının istiqamətləri ayrıca ədəbi-tənqidi məqalələrdə araşdırılmalıdır. O, Mürşüd Mehdinin romanını, eləcə də gənc müəlliflər Kəramətin “Müharibə başlamayacaq”, Orxan Saffarinin “404” və Sərdar Aminin “Yosif” əsərlərini nümunə göstərərək, bu kitablarda müharibə mövzusu, şəhid ailələrinə münasibət, nəsillər və dünyagörüşləri arasındakı fərqlərin bədii əksini maraqlı məqamlar kimi dəyərləndirib. R.Məcid kitab sərgisində müşahidə etdiyi oxucu fəallığının ədəbiyyata marağın az olması barədə fikirləri yenidən nəzərdən keçirməyə əsas verdiyini bildirib. O vurğulayıb ki, sərgidə xarici müəlliflərin kitablarının təqdimatlarına və imza günlərinə böyük maraq göstərilməsi, oxucuların uzun növbələr yaratması cəmiyyətdə kitaba marağın mövcudluğunu təsdiqləyir. Bu, oxucuların diqqətini cəlb edən, onların düşüncə və duyğularına toxunan əsərlərin təqdim edilməsinin vacibliyini göstərir. Sədr müavini gələcəkdə Bakı Beynəlxalq Kitab Sərgisinin ədəbi prosesə təsiri, yeni müəlliflərin yaradıcılığı və detektiv ədəbiyyatın inkişafı ilə bağlı elmi-tənqidi yazıların hazırlanmasını məqsədəuyğun hesab etdiyini bildirib. Müxbir-Tünzalə Arazlı
