Bakı, 31 oktyabr, AZƏRTAC Ötən bir ildə 4 xəstəyə ürək transplantasiyası əməliyyatı icra etdik. Azərbaycanın bu yoldakı səyahəti 1999-cu ildən başlayır. 26-27 illik hazırlıq dövrü məhz ötən il ilk dəfə fevral ayında qaraciyər transplantasiyası ilə başlayan, oktyabrda isə bizim ürək transplantasiyası ilə davam edən meyitdən orqan köçürülməsi vasitəsilə sınaqdan keçirildi. Yəni sistem özünü real vaxtda, real xəstələrlə, real şəraitdə yoxladı. Düşünürəm ki, ölkəmiz bu uzun hazırlıq yolunun sonunda ötən il həmin imtahandan uğurla çıxa bildi.AZƏRTAC xəbər verir ki, bunu Azərbaycan Ürək və Damar Cərrahiyyəsi Cəmiyyətinin fəxri sədri, professor Kamran Musayev “TRANSPLANT 360° – Diaqnostikadan transplantasiyaya” elmi-praktik konfransının rəsmi açılış mərasimindəki çıxışında deyib.Onun sözlərinə görə, dünən arzu olan bu məqsəd bu gün reallığa çevrilib və əsas hədəf onun sabah davamlı ənənəyə çevrilməsidir. Qeyd olunub ki, əsas məqsəd ölkəmizdə davamlı ürək transplantasiyası proqramının qurulması idi. K.Musayev vurğulayıb ki, artıq birillik nəticələr bu istiqamətdə görülən işlərin əhəmiyyətini göstərir: “Dörd xəstənin əməliyyatı texniki cəhətdən uğurlu başa çatdı. Söhbət sadəcə əməliyyatların texniki olaraq uğurlu başa çatmasından getmir. Bütün sistem – həm donorluq, həm də transplantasiya sistemi, bunun tibbi və sosial bütün tərəfləri sınaqdan keçirildi. Həmin sınaqdan bütün sistem uğurla çıxdı”.Professor əlavə edib ki, əldə olunan nəticələr gələcək üçün nikbin olmağa əsas verir. Onun fikrincə, ölkədə ürək transplantasiyası proqramı davamlı ənənəyə çevriləcək və zaman keçdikcə bu sahədə daha geniş vüsət alacaq. Müxbir - Göyçək Mahmudlu Fotoqraf - Orxan Kərimov
