Azərbaycanın Əməkdar artisti, əfsanəvi cazmen Vaqif Mustafazadənin ilk nikahından dünyaya gələn qızı Lalə Mustafazadənin həyatını və fəaliyyəti araşdırılıb.
Araşdırmanı HafizTimes.com saytının rəhbəri Hafiz Əhmədov aparıb.
Nəticədə Lalənin beynəlxalq musiqi müsabiqəsində qazandığı uğur, Fransadakı karyerası, ailə həyatı və ekran fəaliyyəti ilə bağlı maraqlı faktlar üzə çıxıb.
Lalə Mustafazadə – beynəlxalq müsabiqənin qalibi
Lalə Mustafazadənin musiqi karyerasındakı mühüm uğurlardan biri 1991-ci ildə Fransanın Épinal şəhərində keçirilən Beynəlxalq Piano Müsabiqəsində qazandığı birinci Qran-pri mükafatıdır. Müsabiqənin rəsmi nəticələrində onun adı Azərbaycanı təmsil edən pianoçu kimi qeyd olunur.
Vaqif Mustafazadə Azərbaycan musiqi tarixində cazla muğamı özünəməxsus şəkildə birləşdirən sənətkar kimi tanınır. Atasının musiqi irsi ilə bağlılığına baxmayaraq, Lalə öz peşəkar yolunu klassik piano ifaçılığı istiqamətində qurub. Onun beynəlxalq müsabiqədə qazandığı uğur bu yolun mühüm mərhələlərindən biri olub.
Fransada ailə həyatı və ‘Cholous’ soyadı
Lalə Mustafazadə Fransada ailə qurub və həyat yoldaşının ‘Cholous’ soyadını qəbul edib. O, peşəkar fəaliyyətində Lala Cholous (Mustafazadə) adı ilə tanınır.
Fransadakı karyerası: Paris Operasından ‘La Musıka’-ya
Lala Cholous uzun illərdir Fransada pianoçu kimi fəaliyyət göstərir. 1991-ci ildən konsert pianoçusu kimi çalışır, Fransada və digər ölkələrdə – İtaliya, Almaniya, Böyük Britaniya və Rusiyada – konsertlərdə iştirak edir, həmçinin musiqi yazıları hazırlayır.
Onun karyerasının diqqətçəkən mərhələlərindən biri Paris Milli Operasındakı fəaliyyəti olub. Lala Cholous 1999-cu ilin sentyabrından 2019-cu ilin noyabrınadək bu qurumda pianoçu kimi çalışıb. Burada balet artistlərinin gündəlik məşqlərinin musiqi müşayiətini təmin edib.
Bu iş klassik piano ifaçılığından əlavə, rəqs sənətinin tələblərini, məşqlərin ritmini və balet artistlərinin musiqi ilə koordinasiyasını dərindən bilməyi tələb edir. Onun Paris Operasındakı təxminən 20 illik fəaliyyəti peşəkar təcrübəsinin mühüm hissəsini təşkil edir.
(Vaqif Mustafazadə ilə Nərminə xanımın nikah mərasimi – Lalənin valideynləri)
Lala Cholous 2025-ci ilin yanvarından etibarən rəqqaslar, müğənnilər və instrumental ifaçılar üçün musiqi hazırlığı sahəsində də fəaliyyət göstərir. O, müstəqil musiqi fəaliyyəti ilə yanaşı, Fransada ‘La Musıka’ adlı şirkət qurub.
Lalə Mustafazadə “Étoile” serialında: aktrisa kimi pianoçu obrazında
Lalə Mustafazadə musiqi fəaliyyəti ilə yanaşı, aktrisa kimi də kamera qarşısına keçib. O, 2025-ci ildə Amazon Prime Video platformasında yayımlanan Étoile serialında pianoçu obrazını canlandırıb.
Paris və Nyu-Yorkdakı nüfuzlu balet şirkətlərinin dünyasını əks etdirən serialın yaradıcıları Amy Sherman-Palladino və Daniel Palladino, rejissorlarından biri isə Scott Ellis-dir. Layihədə Charlotte Gainsbourg, Lou de Laâge, Luke Kirby, Gideon Glick, David Alvarez, Simon Callow və David Haig kimi tanınmış aktyorlar yer alırlar.
Lala Cholousun ailəsi
Lala Cholousun oğlu Michaël Cholous Fransada informasiya texnologiyaları sahəsində təhsil alır.