“Mercedes” komandasının italiyalı pilotu Kimi Antonelli Meksika Qran-prisində “Formula-1” üzrə dünya çempionu adını qazana bilər.
2026-cı il mövsümünün 19-cu mərhələsi olan Meksika Qran-prisinə bu gün start veriləcək. Yarışlar Mexikoda yerləşən Rodriges qardaşları adına avtodromda keçiriləcək.
Ötən mərhələdə – ABŞ Qran-prisində qalib gələn Antonelli çempionluğu vaxtından əvvəl təmin edə bilməyib. Buna səbəb əsas rəqibləri Lüis Hemiltonun (“Ferrari”) dördüncü, Corc Rassellin (“Mercedes”) isə səkkizinci yeri tutaraq titul uğrunda mübarizəni davam etdirməsi olub.
Meksikada isə 20 yaşlı italiyalının çempion olması üçün cəmi iki xal qazanması kifayətdir. Bu halda rəqiblərinin nəticələrindən asılı olmayaraq, Antonelli dünya çempionu tituluna yiyələnəcək.
O, buna nail olarsa, “Formula-1” tarixinin ən gənc dünya çempionu olacaq. Hazırda rekord 23 yaş 134 günlüyündə çempionluq qazanan almaniyalı Sebastyan Fettelə məxsusdur.
Antonelli, həmçinin Cüzeppe Farina (1950) və Alberto Askaridən (1952, 1953) sonra dünya çempionu olan üçüncü italiyalı pilot kimi tarixə düşəcək.
Qeyd edək ki, Meksika Qran-prisi 23 illik fasilədən sonra 2015-ci ildə “Formula-1” təqviminə qayıdıb. Ötən il burada britaniyalı Lando Norris qalib gəlib.
Mərhələnin sərbəst yürüşləri oktyabrın 30-da başlayacaq. Təsnifat mərhələsi noyabrın 1-də Bakı vaxtı ilə saat 01:00-da, əsas yarış isə həmin gün saat 00:00-da start götürəcək.
