Azərbaycanın qeyri-neft sektoru üzrə ixracında 2026-cı ilin ilk doqquz ayında əhəmiyyətli artım qeydə alınıb. Xarici bazarlara satılan məhsulların dəyəri əvvəlki ilin eyni dövrü ilə müqayisədə 20 faizdən çox yüksəlib.
Banker.az saytının verdiyi məlumata görə, yanvar-sentyabr aylarında Azərbaycanın qeyri-neft sektoru üzrə ixracı, qeyri-monetar qızıl istisna olmaqla, 3,2 milyard ABŞ dolları təşkil edib. 2025-ci ilin müvafiq dövründə bu göstərici təxminən 2,6 milyard dollar səviyyəsində olmuşdu.
İxracın artımı sentyabr ayında daha da sürətlənib. Belə ki, təkcə həmin ay qeyri-neft məhsullarının ixrac dəyəri əvvəlki ilin sentyabrı ilə müqayisədə 50,2 faiz artaraq 372,8 milyon dollara çatıb.
Doqquz aylıq nəticələrə əsasən, Azərbaycanın ən böyük qeyri-neft ixrac bazarı Rusiya olub. Bu ölkəyə 881,4 milyon dollarlıq məhsul göndərilib. Sonrakı yerlərdə 475,2 milyon dollarla Türkiyə, 443 milyon dollarla Gürcüstan, 327,9 milyon dollarla İsveçrə və 121,2 milyon dollarla Ukrayna qərarlaşıb.
Məhsul qrupları üzrə şəkər, alüminium, mis, pambıq və bir sıra kənd təsərrüfatı məhsullarının ixracında artım müşahidə olunub.
