Yeni Azərbaycan Partiyasının VIII Qurultayında Prezident İlham Əliyevin dərin məzmunlu çıxışı ölkəmizin həm bu günü, həm də gələcək inkişafı baxımından bir sıra əhəmiyyətli mesajları ilə yadda qaldı. Bu mesajların dərk edilməsi, bir neçə qlobal problemlərin nəzərə alınması kontekstində mümkün ola bilər. Bu sözləri Milli Məclis sədrinin birinci müavini Əli Əhmədov parlamentin Regional məsələlər komitəsində keçirilən “Yeni Azərbaycan Partiyasının VIII Qurultayında Azərbaycan Respublikasının Prezidenti İlham Əliyevin çıxışından irəli gələn regional inkişaf və yerli özünüidarəetmə sahəsində vəzifələr və çağırışlar” mövzusunda konfransda çıxışı zamanı deyib.O bildirib ki, qlobal dünyada, həyatımızda çox ciddi dəyişikliklər baş verir. Bu dəyişikliklər bütövlükdə bəşəriyyətin əhəmiyyətli keçid məqamlarını özündə əks etdirir. Bütün bunların hamısı hər bir ölkənin bu günü və gələcəyi ilə əlaqədar ölkə rəhbərliyini düşünməyə vadar edir. Prezident İlham Əliyevin çıxışının başlıca məqamları da baş verən qlobal dəyişikliklərlə əlaqədar həm Azərbaycanın gələcəyinin təminatı, həm də qorunması ilə əlaqədar düşüncələrinin cəmiyyətə təqdim edilməsi şəklində qəbul olunmalıdır.